Umfana wesikole "udlwengule" ikhehla
Lisale liphazamisekile emqondweni
USABABAZA umphakathi waseSgedleni, eNdwedwe, ngesenzo somfana wesikole (18), osolwa ngokudlwengula owesilisa (67) wavukwa yiphika kade kuphunywa emcimbini komunye umuzi wakule ndawo.
Kubikwa ukuthi le ndaba isidume wonke amakhona aseSgedleni njengoba kuthiwa lesi sigameko senzeke ngempelasonto yePhasika.
Ngokuthola kweLANGA, umsolwa uzume isisulu - esingeke sidalulwe ukusivikela - maqede wasigila lo mkhuba. Kuthiwa umsolwa uze wafinyelela kuvuthondaba maqede wagqoka, washaya utshani.
Kubikwa ukuthi ikhehla libikele amadoda endawo kwabe sekubikelwa nenduna, uMnu Gayigayi Mngadi, ngaphambi kokuba kuyovulwa icala emaphoyiseni.
Sikhuluma neLANGA isisulu sithi namanje kusenzima ukwamukela lo mhlola esiwugilwe yilo mfana okhulele phambi kwaso. Sithi ngesikhathi umsowa esizuma ubehamba nabafana ababili.
“Ngesikhathi engizuma, laba ababili badlulile yena wasala nami engicindezele phansi, ngingakwazi nokunyakaza. Usuke lapho wangikhumula ibhulukwe waqala lapho ukuzitika ngami.
“Bekungekho ebengingakwenza ngoba ngiyazigulela, ngivele ngavukwa nayiphika. Uqede ukungidlwengula, wagqoka wahamba, wangishiya ngilele phansi. Ngivuke lapho ngagqoka ibhulukwe ngaya ekhaya. Inkosikazi yami ibingekho, ngize ngayitshela isibuya enkonzweni mayelana nale nto engehlele,” kusho isisulu.
Sitshele ILANGA ukuthi besingakaze sizitshele ukuthi lokhu kungenzeka kusona ekubeni sinezingane nomuzi. Inkosikazi yesisulu - nayo engeke idalulwe - ithi isimo sinzima ekhaya emuva kwalesi sigameko.
“Umyeni wami usethuka ubala selokhu ehlelwe yilo mshophi, usesaba ngisho nokuphumela ngaphandle. Bengizitshela ukuthi lokhu kwenzeka kubantu besifazane kuphela kodwa namuhla ngigeze izandla. Izingane zakhe zicasu- kile,” kusho yena.
UMnu Mngadi uthi namanje akakholwa ukuthi kunomuntu onesihluku ngale ndlela, ongadlwengula ikhehla linomuzi nezingane.
“Ungilandise ukusuka nokuhlala ngalolu daba ngabe sengilubika nasenkantolo yesizwe. Sinqume ukuludlulisela emaphoyiseni ngoba lungaphezulu kwamandla ethu,” kusho uMnu Mngadi.
Ukufakazele ukuthi lolu daba luyaziwa endaweni kanti nomsolwa ngowakhona futhi usafunda. Uthi okumphatha kabi ukuthi uMnu ... (ebiza isisulu ngesibongo), uyabonakala ukuthi lesi sigameko simthikamezile ekhanda.
“Ngisho ukhuluma naye kuvele kwehle izinyembezi ebalisa ngesenzo athi senziwe yilo mfana,” kusho uMnu Mngadi.
Okhulumela amaphoyisa KwaZulu-Natal, uLt Col Thulani Zwane, uthi likhona icala lokudlwengula elivuliwe kanti umsolwa oneminyaka eli-18 uboshiwe, uzovela namuhla eNkantolo yeMantshi yaseNdwedwe.
Okhulumela uMnyango wezokuThuthukiswa koMphakathi, uNkk Ncumisa Ndelu, uthe bazothumela osonhlalakahle ukuze umkhulu ezolulekwa ngokomqondo.