IZululand izokweseka osomabhizinisi bendawo
Bagqugquzelwe ukuzithuthukisa ukuze bezohlomula
IBUYISE ithemba kosomabhizinisi abangaphansi kukaMasipala wesiFunda iZululand, iMeya Thulasizwe Buthelezi - engakaqedi sikhathi esingakanani ihola lo masipala.
Emhlanganweni obusehhotela elisoNdini, ngoMsombuluko, imeya yethembise osomabhizinisi ukuthi itshe lizogaya ngomunye umhlathi kusukela ngoNtulikazi (July) nonyaka njengoba umasipala umatasa nokwenza izinguquko zenqubo yawo, ikakhulukazi ebudlelwaneni bawo nosomabhizinisi.
Ithe noma iyiphi indawo ithuthuka ngokuphumelela kosomabhizinisi bayo, yathi kuzophela nya obekwenzeka phambilini eZululand lapho bekuhlomula osomabhizinisi abavela ngaphandle kwalesi sifunda ngoba kuphambene nenqubo kahulumeni, ethi lowo nalowo masipala kumele uthuthukise indawo engaphansi kwawo. “Kuwuhlelo lwethu njengeqembu elibusayo (kulo masipala - okuyiNkatha Freedom Party) ukubonisa ukuthi lesi yisikhathi sokuba sinikeze amandla kosomabhizinisi balesi sifunda.
“Sidumele ukubona ukuthi umnotho wale ndawo kawufukuli amabhizinisi ayo.
“Sifuna ukuba isabelomali esiwuR1,1 billion sitshalwe khona lapha kulesi sifunda," kusho iMeya uButhelezi, ewumfundisi ogcotshiwe.
Ithe kakunabo ubulungiswa ukuba nxa kunomsebenzi, isibonelo;ka-R100 000 000 bese ithenda yawo inikezwe inkampani eyodwa.
Ibe isichazela osomabhizinisi ukuthi okwamanje mine imikhakha abazoqala kuyo: Ezolimo, ezokuvakasha, ezobuchwepheshe nezamanzi nengqalasizinda yokukhucululwa kwendle.
Igcizelele ukuthi osomabhizinisi kumele bazilungiselele ukuze bahlomule, kungathi nxa kuphuma ithenda bese uma kufunwa ubufakazi bokuthi uzokwazi yini ukuwenza bese ethembisa ukuthi uzolekelewa ngosiphecelengwana abathile futhi okungebona abangaphansi kwalo masipala.
Ibe isibeka izifiso zikamasipala njengokugqugquzela ezokuvakasha - okungase kuholele ekusetshenzisweni kwesikhumulo sezindiza esisoNdini kanye nokwakha indawo yemihlangano yezinga eliphezulu.
Kalusalanga udaba lwamanzi - njengoba eyinkinga kulesi sifunda - imeya ithe bahlela imali yokululungisa.
Icele osomabhizinisi ukuba bacabange ngendaba yokubumba inhlangano yabo, i-business chamber ngolwasemzini - ukuze ihleleke kahle indlela yabo yokusebenzisana nomasipala.
Benikwa ithuba osomabhizinisi, babeke izinsolo zokuthi kukhona okushaya amanzi ngezisebenzi zehhovisi elikhipha amathenda, bathi sengathi yilapho bebanjwa khona ngophondo.
Babuze ukuthi uma abantu abaphuma ngaphandle kwaseZululand beveza imininingwane yokuthi bahlala kulesi sifunda, iyoxazululwa kanjani leyo nkinga. Imeya yethembise ukuthi konke lokhu umasipala uzokusukumela.
Sidumele ukubona ukuthi umnotho wale ndawo kawufukuli amabhizinisi ayo. Sifuna ukuba isabelolomali esiwuR1,1 billion sitshalwe khona lapha kulesi sifunda...