Bancome amagalelo ommeli
Nokuthanda kwakhe imfundo esikhumbuzweni sakhe
KUNCONYWE amagalelo ommeli odutshulwe wabulawa ngoLwesine olwedlule engena emzini wakhe oseLa Lucia ngesikhathi kunenkonzo yesikhumbuzo sakhe izolo ngoLwesithathu eMkhumbane Hall, eThekwini.
UMnu Thamsanqa Ndwandwe (46) - ILANGA elibikile ngokudutshulwa kwakhe oshicilelweni lwalo lwangoMsombuluko - unconywe nangokuthanda imfundo nokugqugquzela abanye abantu ukuba basukume bazithathe.
Ozakwabo kwezobumeli, abangani nezihlobo bebephume ngobuningi babo ukuyobhonga emswaneni.
Obekhulumela abangani, uMnu Sthembiso Mbhele, uncome uMnu Ndwandwe ngokuthi ubeyithanda imfundo, ekhuthaza nabangani bakhe ukuba baqhubekele phambili nayo.
Bathi ubewuthanda futhi nomsebenzi wakhe.
UMnu Ndwandwe ushona nje, ubengamile nemfundo.
UDkt Nomvula Mthembu, ongudadewabo kaMnu Ndwandwe, uveze ukuthi ubezwana nomfowabo futhi ulahlekelwe kakhulu ngokushona kwakhe.
Uthi bebegqugquzelana ngokufunda, kwesinye isikhathi bafonelane baxoxe ngomsebenzi wesikole.
Ekhuluma naleli phephandaba, uwachithile amahlebezi asabalele okuthi kukhona ukungaboni ngaso linye phakathi kwakhe nenkosikazi yomfowabo.
Uthe kuyiqiniso ukuthi ummeli ufike nencwadi yefa ebhalwe ngumufi, ebhale yena (uDkt Mthembu) njengomuntu afisa ukuba engamele umngcwabo wakhe nokuthi bekuyisifiso sakhe ukuba angcwatshelwe kubo KwaNongoma.
“Izinto zihamba kahle phakathi kwethu nomakoti womfowethu, sibambisene kahle ngamalungiselelo omngcwabo. Akabanga nankinga ukuthi umyeni wakhe ayofihlwa ekhaya KwaNongoma,” kusho uDkt Mthembu.
Uveze ukuthi bewumndeni basasele nesilonda njengoba bengazi ukuthi umuntu obulale umfowabo ubefunani, kwazise kakuthathwanga lutho ngesikhathi ebulawa.
Uchithe namahlebezi alokhu evela okuthi incwadi yefa iveza ukuthi umakoti wakubo akabhaliwe emafeni omyeni wakhe.
Uthi umfowabo uzofihlwa ngoMgqibelo kubo KwaNongoma ngemuva kwenkonzo ezoqala ngo-09h00.
ILANGA libike kabanzi ngeledlule ngokudutshulwa kubulawe uMnu Ndwandwe.
Ngemuva kokubulawa kwakhe, kusabalale izinsolo zokuthi kunophenyo abelwenza oluthinta ukusebenza kwelinye lamabhange aseNingizimu Afrika.
Kuthiwa uphenyo abelwenza beluzovu- ndulula amanyala abengagcina eholele ekuboshweni kwabathile.
Okhulumela amaphoyisa KwaZulu Natal, uLt Col Thulani Zwane, uthi amaphoyisa abengakabophi muntu ngalesi sigameko kodwa aphansi phezulu nophenyo.
nomfundo@ ilanganews. co.za