BAFUNA UBULUNGISWA "ABASHAYWE" AMAPHOYISA
ZISAQAQAMBA izinhliziyo zabesilisa abathandana ngokobulili obufanayo abathi babanjwe, bashaywa ngamaphoyisa ePhoyinti, eThekwini ngeledlule, athi azobadedela uma sebekhalisa okwamadoda.
Laba besilisa baseChesterville bathi bafuna ukubona ubulungiswa kulolu daba. Bathi amaphoyisa abashaya nje, abebasola ngokweba.
UMnu Vincent Sipho Nkosi, ongomunye wabashayiwe, uthi usekude ukuyikhohlwa into emehlele yena nomngani wakhe, uMnu Kgothotso Mawela.
Utshele ILANGA ukuthi ngesikhathi amaphoyisa ebashaya, abebabiza ngezitabane.
Bafuna athathelwe izinyathelo ngokubehlisa isithunzi, kwazise konke lokhu bathi bekwenzeka phambi kwabantu.
Utshele ILANGA ukuthi amaphoyisa ambuze ukuthi uwuthathephi umakhalekhukhwini abewuphethe, athi uzoboshwa ngoba uwebile.
Uthi kuphele imizuzwana abuya amtshela ukuthi makagoduke, amnikeza nalo makhalekhukhwini abemsola ngokuthi uwebile.
“Uma ngicabanga ngalokhu, ngivele ngifikelwe yizinyembezi ngoba ngehliswe isithunzi ngishaywa ngezimpama ngingenze lutho.
“Ngifuna abhekane nomthetho la maphoyisa ngoba lokhu akwenze kithina ayokwenza nakwabanye abathandana ngokobulili obufanayo. Elinye lize langitshela ukuthi lizongiceba endodeni yami ngoba ngiyafeba, ngihamba nenye indoda - yize ngichazile ukuthi singabangani,” kusho yena.
UMnu Sibongiseni Khumalo weLesbian and Gay Centre, uthi bawutholile umbiko ngalolu daba, uMnu Nkosi noMnu Mawela bazobeseka.
Uthi kuyethusa uma into enjena yenziwa ngamaphoyisa ekubeni besebenzisana nawo ekulweni nokuhlaselwa kwabathandana ngokobulili obufanayo.
Okhulumela amaphoyisa KwaZulu-Natal, uLt Col Thulani Zwane, uthi kuvulwe icala lokushaya ngenhloso yokulimaza. Bekungakaboshwa muntu.