AKASABUTHI QUTHU OSATSHISWA NGUMFOWABO
AKASABUTHI quthu ubuthongo owesilisa waseHluhluwe, onebala elimhlophe othi usongelwa ngumfowabo ngokumyisa kwagoqanyawo ukuze ezothengisa ngezicubu zakhe zomzimba athole izishaqane zemali.
UThabani (32) (okungelona igama lakhe langempela) uthi usehlafuna ejeqeza kuhle kwenyamazane ngenxa yezinsongo zomfowabo - ILANGA elinalo igama lakhe.
Uthi sekukaningi umfowabo ethi uzombulala ukuze athengise ngezicubu zakhe kubelaphi bendabuko ukuze ezoceba kwazise kunabantu abahlala bembuza ukuthi kungani ehlupheka ekubeni ehleli neQuantum egcekeni (esho umfowabo).
Uthi useke walubika emndenini udaba lokusongelwa ngumfowabo.
“Njengoba bekugujwa iPhasika, bengingakhululekile ngenxa kamfowethu obengitshela kwezikabhoqo ukuthi ufuna ukuthenga amatekisi ngemali yezicubu zomzimba wami.
“Ngilala isikhashana emuva kwalokho ngiphume ngibheke ngaphandle ukuthi akukho yini okunginyonyobelayo,” kusho uThabani.
Ethintwa umfowabo, uthe kakulona iqiniso okushiwo nguThabani, yena usuke emdlalisa.
Uxwayise leli phephandaba ngokuthi liphume liphele ezindabeni zokudlalisana kwakhe nomfowabo.
ILANGA lixhumane noMnu Maxwell Thabethe, ongusihlalo we-Albinism Society KwaZuluNatal, othe kuyishwa ukuthi namanje kusenabantu abangadlalisa abanye ngokufa.
“Ngibona sisikhulu isidingo sokuba kushaywe umthetho obhekelela ukuvikelwa kwabantu abanebala elimhlophe ngoba lokhu kuyinkomba yokuthi abantu bakwenza ngoba bazi ukuthi kakukho lapho bezoshushiswa khona.
“Baningi abantu ababulewe ngenxa yale nkoleloze. Lolu wudaba okufanele lusukunyelwe,” kusho uMnu Thabethe.
Okhulumela amaphoyisa KwaZulu-Natal, uLt Colonel Thulani Zwane, uthe uMnu Thela kumele ayobika udaba enkantolo lapho azofike enzelwe incwadi yesivimbelo, ekhuza umfowabo ukuba ayeke ukumsabisa.