BASHAYA AMAKHALA NGOFE EYE ENTOMBINI

SITHOLWE emhosheni yilungu lomphakathi, sesonakele isidumbu sowesilisa waseZinkunzini, eNkandla, obese kuphele amasonto amabili enyamalele kade eyobona intombi yakhe. Ngokuthola kwe

uMnu Sandile Vilakazi (32) ( osesithombeni), uhambe eyobona intombi yakhe kwaze kwaphela isonto engabuyelile kubo.

Kuze kwabikwa emaphoyiseni ngoba sekunezinsolo zokuthi kukhona okushaya amanzi.

Ilungu lomndeni kamufi, uMnu Mpheni Vilakazi, litshele ILANGA ukuthi bekuwusuku lokuqala eyobonana nale ntokazi.

Uthi okubadide kakhulu wukuthi emuva kokuba sebezwile ukuthi umufi unyamalele, le ntokazi ibalekile yaya KwaNongoma.

“Okuxakayo wukuthi ibalekiswa yini le ngane. Le yonto ishiya imibuzo engaphenduleki kodwa sesithembe amaphoyisa ukuba aluphenye lolu daba, kubekhona oboshwayo ngoba ukufa kukaSandile kushayisa amakhala,” kusho uMnu Vilakazi.

Uthe kayikho ingxabano abayaziyo phakathi kwendodana yabo nalona wesifazane ebihlekisana naye ngoba uhambe ejabule kwazise bekuwusuku lokuqala eyobonana nayo.

Utshele leli phephandaba ukuthi banezinsolo zokuthi indodana yabo ibulewe ngenhloso.

Ngokwemibiko, kuthiwa lona wesifazane uye KwaNongoma wathi uyovakashela uyisekazi.

Okhulumela amaphoyisa, uColonel Thembeka Mbhele, uthi icala livuliwe esiteshini samaphoyisa eKhombe mayelana nokufa kukaMnu Vilakazi, kodwa bekungakaboshwa muntu.

Uthe amaphoyisa asaphenya.