Usolwa ngokudlala ngemali umasipala
Kuthiwa imeya iqashelwe imoto kube kunehleli
USOLWA ngokudlala ngemali yabakhokhi bentela uMasipala uMtubatuba, okuthiwa iMeya yawo, uMnu Velangenkosi Gumede, kayihambi ngeJeep Grand Cherokee ethengwe wumasipala ngoba ithi iyayesaba.
Phambilini le moto, okuthiwa inesikhathi esingangonyaka ithengiwe, ibihamba uMnu Qhina Mkhwanazi obeyimeya kulo masipala kanti ithengwe ngemali ecelela esigidini samarandi.
“Ngenyanga edlule le moto beyisetshenziswa ngabashayeli bakaSomlomo Mavis Davies komunye umcimbi, okusho ukuthi kakukho lutho olungalungile ngayo, kufanele ngabe imeya ihamba ngayo,” kusho umthombo weLANGA ongaphakathi kulo masipala.
Uthi kuyaxaka ukuthi sekuze kwaphela izinyanga ezingaphezulu kwezine uMnu Gumede ekwesokuba yimeya kungenzeki lutho ngale moto.
“Esanda kungena kuleli hhovisi, ubehamba ngeyakhe, iMercedes Benz. Kuthe ngemuva kwesikhathi waqashelwa (iToyota) Fortuner asehamba ngayo-ke manje,” kusho lo mthombo.
IMenenja kaMasipala, uMnu Jackonia Mngomezulu, iyikhahlele ngazo zombili eyokuthi uMnu Gumede akahambi ngale moto ngoba eyisaba.
Uthi okwenza angahambi ngayo - yize isenonyaka ithengiwe - besaba ukuthi kungenzeka ukuthi kayisekho esimeni esifanele ngoba amakhilomitha ayo asephezulu kakhulu, okubaphoqa ukuba bayichithe ukuze bathenge enye.
Uthe amakhilomitha asengaphezulu kwali-110 000. Utshele ILANGA ukuthi ngenxa yokuthi kayikho enye imoto ebingasetshenziswa nguMnu Gumede kulesi sikhathi efikile, babone kunesidingo sokuqasha enye ngesikhathi kusalungiswa udaba lwale moto endala.
Uqhube wathi abantu kubalulekile ukuba baqonde ukuthi uMtubatuba nezindawo eziwakhele kayikho imigwaqo ekhonkiwe, lezi zimoto zihamba obhuqwini esikhathini esiningi.
UMnu Gumede uthe wukuqhatha okuphindiwe lokhu okukhulunywa ngabantu, ukuthi akahambi ngemoto kamasipala ngoba kukhona akusabayo noma acabanga ukuthi kwashiywa nguMnu Mkhwanazi kuyona.
“Ukuqhatha izingane zendoda eyodwa lokhu okukhulunywayo. UMkhwanazi siyizingane zandawonye naye, sihlala naye emkhandlwini kamasipala siphinde sihlale naye esigungwini seqembu lethu, iNkatha Freedom Party (IFP).
“Kimina ungumfowethu futhi kasikaze sixabane ngakho-ke kakunasizathu sokuba kuthiwe kukhona engikusabayo ngaye,” kusho imeya.
Uthe ngesikhathi efika kwesobumeya, ubuzile ngesimo semoto kwatholakala ukuthi kayikho esimeni ngoba ibisinamakhilomitha amaningi kakhulu, ngaphezulu kwe- maintanance plan.
“Umkhandlu unqume ukuba idayiswe ukuze kuthengwe entsha ngoba nami kubalulekile ukuba ngihambe ngemoto ephephile,” kusho uMnu Gumede.
Uvumile ukuthi ngesikhathi esanda kuqala kulo masipala ubehamba ngemoto yakhe, ekhokhelwa amakhilomitha.
Okhulumela uMnyango wezokuBusa ngokuBambisana nezoMdabu KwaZulu-Natal, uMnu Msawakhe Mayisela uthe bebengazi ukuthi kunomdonsiswano ngemoto kulo masipala, wathi bewumnyango bayaye bancome ukuba omasipala basebenzise imali yabakhokhi bentela ngendlela.
“Uma le mibiko iyiqiniso, kwethusa kakhulu ukuthi kungaze kuchithwe imali engaka kodwa imoto ikhona. Lolu daba siyalusukumela ukubona ukuthi singenzenjani ukunqanda ukusetshenziswa budlabha kwemali yabakhokhi bentela,” kusho yena.