OLUNYE UTALAYITA KUMASIPALA WEZINXUSHUNXUSHU
SELUTHATHE elinye igxathu udaba lwemenenja kaMasipala iDr. Nkosazana Dlamini-Zuma, uMnu Nkosiyazi Vezi njengoba isifake enkantolo lo masipala noMnyango wezokuBusa ngokuBambisana nezoMdabu KwaZulu-Natal, oholwa nguNkk Nomusa Dube-Ncube, ongungqongqoshe. Kuzokhumbuleka ukuthi ngasekuqaleni konyaka ILANGA libike ngokushuba kwesimo kulo masipala ngemuva kokukhangiswa kwesikhundla semenenja.
UMnu Vezi - obevele esiphethe lesi sikhundla - naye uyile kwi-hlolokhono kodwa kwagcina kungaqashwanga muntu ngoba kuthiwa kunamakhansela ashaye phansi ngonyawo athi kawamfuni. Engxoxweni ekhethekile abenayo neLANGA ngasekuqaleni konyaka, uMnu Vezi usole amakhansela athile ngokumbophela amanqina enyathi ngoba ethole ukuthi nguyena obashaye bonke emakhanda kwinhlokhono kodwa kuthe sekumele abekwe ngokugcwele, amanye amakhansela amchitha.
UMnu Vezi uveze ukuthi isinqumo ngesikhundla semenenja kulo masipala sesize sahlukanisa phakathi amakhansela njengoba imeya, uNkz Ngeneleni Mncwabe, nosotshwebhu uMnu Mlungisi Zikode, kubikwa ukuthi bona bafuna aqhubeke kulesi sikhundla kodwa abanye bashaya phansi ngonyawo bathi ngeke kwenzeke lokho.
UMnu Vezi - engxoxweni abe nayo neLANGA phambilini - uthe phakathi kwamakhansela athi kawahambisani nokuqokwa kwakhe, amanye awo yingoba kunamgqubu ambambele wona ngenxa yokushayisana okuke kwaba khona phakathi kwawo naye kubangwa umsebenzi.
Uthi uyakholelwa ekutheni amanye ala makhansela kawamfuni kulesi sikhundla ngoba efuna ukufeza izinhloso zawo ezihlanganisa ukumoshwa kwemali, wukuqashwa kwabathile ngokungemthetho, wukwenzelelwa kwabanye nokufuna ukuphatha umasipala sengathi ngoweqembu elithile noma ngobawabantu abathile. Ngokuthola kwe- uMnu Vezi ubeseNkantolo yeziSebenzi eThekwini ngoMsombuluko.
“Kuliqiniso ukuthi bengisenkantolo yezisebenzi izolo (ngoMsombuluko) ngemuva kokufaka umasipala nomnyango kuyona ngoba ngifuna ingenelele imise udaba lokukhangisa kabusha lesi sikhundla.
“Ngifuna ukuthi bangichazele ukuthi kungani bengangiqashi ngoba kwababili abasalile (kwinhlokhono) yimi ophumelele kodwa amakhansela athile angangithanda,"kusho yena.
Uthi inkantolo ikumisile isikhashana ukuqhutshwa kokukhangisa ngalesi sikhundla kuze kube kudingidwa udaba lwakhe. Kwenzeka lokhu nje, isitelinga kuMasipala iDr Nkosazana DlaminiZuma sesibanjwe wumlawuli othunyelwe wumnyango ngenyanga edlule.
Kuvela ukuthi umnyango uthumele umlawuli nje, yingoba nawo usuthole amaphepha avela enkantolo ngalolu daba. Okhulumela uMnyango wezokuBusa ngokuBambisana nezoMdabu KwaZulu-Natal, uMnu Msawakhe Mayisela uthe:
“Thina njengomnyango siyawuhlonipha umthetho futhi sizokwenza noma yini eshiwo yinkantolo. Okubalulekile wukuba kube nozinzo kumasipala futhi kungabi nezithiyo ezivimbela ukuyiswa kwentuthuko kubantu abakhele lo masipala.”