"Abaphumele obala abafuna ukuketula umengameli"
UMabuyakhulu uthi uMnu Jacob Zuma akufanele athule
I-AFRICAN National Congress (ANC) KwaZulu-Natal ifuna baphumele obala osikhwili phambana nobhoko abangamalungu aleli qembu kulesi sifundazwe, abashaya indiva ubuholi bukazwelonke - obuholwa nguMengameli Cyril Ramaphosa - ukuze bezothathelwa izinyathelo. Lokhu kutshelwe ILANGA nguMnu Mike Mabuyakhulu oyilungu lekomiti lesikhashana le-ANC KwaZuluNatal.
Uphawula kanjena nje uMnu Mabuyakhulu, kunodaba olusematheni kulezi zinsuku kwabezindaba nasezinkundleni zokuxhumana lokuthi kunabathile abangabalandeli bakaMnu Jacob Zuma ababopha itulo lokuketula uMnu Ramaphosa - okungakapheli ngisho izinyanga ezine enguMengameli we-ANC.
Kuthiwa lokhu bazokwenza ngokuqhekeza ivoti okhethweni oluzayo ngokuvotela i-ANC KwaZuluNatal kodwa kuzwelonke amavoti abo bawaphe iqembu elizwelana nabo.
Kunemibiko ethi abalandeli bakaMnu Zuma bacabanga phakathi kokunye ukuba basebenzisane nomholi weBlack First Land First, uMnu Andile Mngxitama - obonakele eNkantolo eNkulu yaseThekwini mhla ziyisi-6 kwephezulu eyokweseka uMnu Zuma obhekene namacala ali-16 enkohlakalo.
Kuvela nezithi umholi weTwelfth Apostles Church in Christ, uMphostoli Caesar Nongqunga - ongumlandeli kaMnu Zuma - usesungule iqembu elisha lezepolitiki i-African Transformation Congress, okuthiwa uthole isibusiso kuMnu Zuma sokwenza lokho.
Kuthiwa abaholi bebandla babe nomhlangano eMgababa, eThekwini, lapho kufundwe incwadi ebhalelwe i-ANC ukuyazisa ngesinqumo sokusungula iqembu elisha.
Ngokombiko wephephandaba lesiNgisi eliphuma ngeSonto, iSunday Times, abanye abaholi beANC KwaZulu-Natal bathi miningi imihlangano eyinguyazana eyenziwe kulesi sifundazwe lapho abeseka uMnu Zuma bakhe khona itulo lokugudluza uMnu Ramaphosa esikhundleni.
Phakathi kokunye wukuba kwenziwe isiqiniseko sokuthi uMnu Sihle Zikalala uyakhethwa futhi njengosihlalo we-ANC KwaZuluNatal uma isifundazwe sesikhetha ubuholi baleli qembu engqungqutheleni okulindeleke ukuba ibe sekupheleni kwenyanga.
Emuva kwalokho-ke kuthiwa isigungu esiholwa nguMnu Zikalala siyocela umhlangano singakashayi isikhathi seNational General Council ye-ANC bese uguqulwa ube ngowokhetho lobuholi ukuze kugudluzwe uMnu Ramaphosa.
ILANGA lithinta uMnu Mabuyakhulu izolo ngoLwesithathu, uthe bona njenge-ANC KwaZulu-Natal bayabuhlonipha ubuholi baleli qembu kuzwelonke, obukhethwe eNasrec, eGoli engqungqutheleni ebimhla zili-16-20 kuZibandlela (December) wezi-2017.
“Uma kukhona abagqugquzela ukuba bushaywe indiva lobu buholi obukhethiwe, kufanele baphumele obala ukuze bathathelwe izinyathelo zokuqondiswa izigwegwe ngoba lokhu abakwenzayo kuphambene nenqubomgomo ye-ANC.
“UMnu Zuma ngumholi esimhloniphayo futhi esimthatha njengenjulabuchopho kwezepolitiki, sili- ndele ukuba naye angathuli nje abukele uma ezwa la mahlebezi athinta igama lakhe kodwa asukume abakhuze laba abafuna ukungcolisa igama lakhe.
“Siyakholelwa kakhulu ebuholini bakhe njengoba eseke waba yiphini likanobhala-jikelele enhlanganweni waphinde waba ngumengameli wayo i-ANC.
“Kangikholwa ukuthi angathula kukhona abafuna ukudala uqhekeko eqenjini besebenzisa igama lakhe,” kusho uMnu Mabuyakhulu.
USolwazi Bongile Mayaba wenkampani yabameli iBMM Incorporated, ethintwa yiLANGA, uthe ukhona umsuka wala mahlebezi avele emaphephandabeni.
“Okokuqala obengumengameli, uMnu Zuma unobuhlobo obuhle nalo mfundisi weThe Twelfth Apostles, kakwethusi ukuzwa ukuthi uzosungula iqembu lepolitiki elizwelanayo noMnu Zuma.
“Okwesibili ngesikhathi kunomlindelo e-Albert Park eThekwini, uMnu Zuma ezovela enkantolo, ku- khona abanye abebememeza bethi: ‘Phansi ngoRamaphosa’. Phakathi kokunye babethi makuhlangane iNational General Council ngokujwayelekile ehlangana ngoba kubuyekezwa ukuthi ubuholi buyehluleka yini noma buyaphumelela ukwenza obukuthunyiwe.
“Akekho noyedwa kwabathintekayo kula mahlebezi oseke wawuphikisa umbiko ophume emaphephandabeni, ngisho noMnu Zuma imbala,” kusho uSolwazi Mayaba.
Kuthiwa nxa abalandeli bakaMnu Zuma bengaphumeleli ukuthola iningi lamalungu e-ANC, bahlela ukushaya indiva ubuholi bukaMnu Ramaphosa basebenze njenge-ANC ezimele KwaZulu-Natal.
Ethintwa yiLANGA uMnu Zikalala, uthe malibheke uvo lwabo kumyalezinyazi (online). Ekhuluma ekhasini labo leFacebook elithi: ANC KwaZulu-Natal, uthe kungamanga aluhlaza okushiwoyo, wathi abezindaba mabayeke ukukhuluma izinto eziyinzwabethi, ezingenasisekelo ngoba badukisa abantu.
Kuvele omunye obemphikisa ethi makangacashi ngesithupha ngoba le nto abayenzayo icacile ukuthi balwela uMnu Zuma.
“Kahle ukukhuluma ilumbo uqambele abamaphepha amanga. Uma usukhohliwe, sizokukhumbuza, bekuyilo iphephandaba elaqala ukuveza udaba lukaKhwezi Khuzwayo nalapho nasho okufanayo nathi singawakholwa amaphepha anamanga.
“Gwiqiqi, sabona nina futhi senithi niyameseka umsolwa. Amaqabane akuleso sifundazwe kumele azibuze aziphendule ukuthi kungani uma niphika ukuthi neseka uMsholozi kodwa nilokhu niqhubeka nokuwanika izikibha ezinobuso bukaMnu Zuma, hhayi obukaMnu Ramaphosa.
“Uyophuphuthekisa ingcosana, hhayi thina sonke. Kuyangijabulisa ukuthi bakhona abantu bakuleso sifundazwe asebebonile ukuthi bathelwa ngodaka emehlweni,” kusho omunye wabebephawula.
Omunye uthe: “Ngizovotela iqembu lami i-ANC uma sekuvotwa, kodwa ngeke ngilivotele kuzwelonke.”