Zizitshelwani izinkulumo ezicwasayo zikaMalema
SEKUWUMLANDO manje ukuthi umzamo we-EFF ne-ANC wokuketula esihlalweni iMeya yaseNelson Mandela Bay (NMB), e-Eastern Cape, uMnu Athol Trollip, ubuye wehluleka futhi ngoLwesibili kungavotwanga nokuvotwa emkhandlwini wedolobha ozinze ePort Elizabeth.
Kuzokhumbuleka ukuthi lona bekuwumzamo wesibili wokuzama ukuxosha ngevoti lokungamethembi uMnu Trollip omele iDA, okuyilona qembu elithole izihlalo eziningi kulo masipala okhethweni lohulumeni basekhaya ngowezi-2016.
Kulolu khetho iDA kayikwazanga ukuthola izihlalo ezingaphezu kwama-50%, okuyiphoqe ukuba isebenzisane namaqembu amancane - okubalwa lapha i-EFF - ukuze ikwazi ukuphatha umasipala. I-EFF manje isivukele iDA esiswini njengotshwala kulo masipala, osekubeke isikhundla sikaMnu Trollip engcupheni emkhandlwini.
Imizamo yokumketula ibaselwa ngumholi we-EFF, uMnu Julius Malema, othi ucasulwe wukuthi iDA yenqaba ukuvotela isiphakamiso seqembu lakhe ephalamende likazwelonke sokuba kudliwe umhlaba kubanikazi bamapulazi ngaphandle kokukhokhwa kwesinxephezelo.
Kufanele sikusho lokhu; kuvumelekile ngaphansi kwenqubo yombuso wentando yeningi ukuzama ukuketula ngevoti iqembu eliphethe noma umholi walo esihlalweni sokuphatha. Ngakho kuyilungelo layo iEFF ne-ANC ukwakha umbimbi, bazame ukukhomba uMnu Trollip indlela.
Okungezwakali kahle yizizathu zabo zokuthatha lesi sinqumo, ikakhulukazi i-EFF. Leli qembu lithi ngaphandle nje kokuthi lihlose ukufundisa isifundo iDA ngenxa yokuthi kayisivotelanga isiphakamiso sayo sokudliwa komhlaba, ifuna kuxoshwe uMnu Trollip ngoba engumlungu. Lesi sizathu se-EFF kasamukeleki ngoba sibandlulula ngokwebala, okuyinqubo abantu bakuleli abalwe nayo iminyaka eminingi kusaphethe uhulumeni wabamhlophe bodwa, yaze yanqotshwa ngowe-1994 ngesikhathi kuthatha uhulumeni wentando yeningi.
Akesenze isibonelo: uma usopolotiki ongumlungu, oyilungu leDA, engatshela izwe ukuthi kufanele umengameli wezwe, uMnu Cyril Ramaphosa axoshwe esikhundleni ngoba ungumuntu onsundu, bangathini abantu abampisholo? Ngeke yini kusuke umsindo, kuthiwe lowo mlungu uyabandlulula, kufanele aphenywe yikhomishini yamalungelo abantu, amangalelwe nakwi-Equality Court? Yingani pho izinkulumo zokucwasa ngokwebala ezikhulunywa nguMnu Malema zinganakwa, futhi angathathelwa izinyathelo zomthetho?
Sekuyisikhathi sokuba wonke amaqembu akuMasipala waseNMB ayeke ukudlala ipolitiki eshibhile, kodwa abhekane ngqo nokuphucula impilo yabantu bakuloya masipala. Uma uMnu Trollip kuwukuthi akawuphethe ngendlela ehlelekile umasipala, makaxoshwe, kodwa makungasetshenziswa ubandlululo kuthiwe makaxoshwe ngoba emhlophe ngebala. Lokho kungaba wubuwula obusibuyisela emuva njengezwe.