KUWE ENYE INSIKA YEZOMBUSAZWE
ISIPHENDUKE isishozi iNingizimu Afrika njengoba kuthe isabhekene nokuzilela uNkk Winnie Madikize-Mandela - obekunenkonzo yesikhumbuzo sakhe izolo ngoLwesithathu - sekuphinde kwadlula emhlabeni uMnu Zola Skweyiya (75) obengomunye womakadebona be-African National Congress (ANC).
Izindaba zokudlula kukaMnu Skweyiya zizwakale ekuseni izolo kanti kuthangi bekukhunjulwa usuku okubulawe ngalo uMnu Chris Thembekile Hani, owayengunobhala weSouth African Communist Party (SACP) - obulawe zili-10 kuMbasa (April) we-1993.
UMnu Skweyiya ushone sekusele izinsuku ezintathu kube wusuku lwakhe lokuzalwa, ngokusho kwesitatimente sikaMnu Pule Mabe okhulumela i-ANC.
Ubengungqongqoshe wokuqala wezemisebenzi yomphakathi nokuphatha kusukela ngowe-1994-1999.
Kuthe lapho kuba nezinguquko kwikhabhinethi, waphathiswa umnyango wezenhlalakahle kwaze kwaba ngowezi-2009.
Ngawo unyaka wezi-2009, ujutshwe wuhulumeni ukuyoba yinxusa laseNingizimu Afrika e-United Kingdom nase-Ireland.
Ubuyele kuleli lapho eqhubekile nokusebenzela i-ANC.
Ubengomunye womakadebona be-ANC okuthe ngowezi-2016 bacela uMnu Jacob Zuma ukuba ashenxe esikhundleni sokuba ngumengameli wezwe.
“Ukushona kwakhe kuvule inkebenkebe yenxeba, ikakhulukazi emuva kokushona kukaMama Winnie ngesonto eledlule," kusho uMnu Lesufi.
UMnu Skweyiya uzalelwe eSimon’s Town, eWestern Cape wafunda ePort Elizabeth naseCape Town.
Umatikuletsheni uwuphothule eLovedale, e-Alice ngaphambi kokudlulela e-University of Fort Hare lapho afike wangenela ezombusazwe wabafundi.