I-IAAF ISHAYA UMTHETHO OZOQEDA NGEKUSASA LIKA-CASTER
INHLANGANO yezokugijima emhlabeni i-International Association of Athletics Federation (IAAF) ishaye umthetho obukeka uzoqeda ngekusasa likaCaster Semenya ( osesithombeni) kwezokugijima.
UCaster usematheni kulezi zinsuku ngemuva kokuba ethole indondo yegolide kwi-1500m kumaCommonwealth Game aqhubekayo e-Australia.
UCaster wenze izimanga ecisha irekhodi lakuleli le-1500m ebese lineminyaka engama-34 libekwe uZola Budd. UCaster wenze u-4:00:71 ecisha elika-Zola u-4:00.81 waphinde wephula nelemaCommonwealth Game.
I-IAAF yenze isiphakamiso sokuthi kusukela ngoLwezi (November) abagijimi besifazane abanama-hormone amaningi abanika ithuba elingcono lokunqoba bangavunyelwa ukugijima nabanye besifazane ebangeni lika-400m kuya ku-1500 okungamabanga agijinywa nguCaster.
Kwenzeka lokhu nje, kuzokhumbuleka ukuthi kusenodaba oluyinzukazikeyi lobulili bakhe.
Kuzokhumbuleka ukuthi ngowezi-2011 iCourt of Arbitration for Sport (CAS) inikezele i-IAAF umnqamulajuqu wokuba ibanikezele umphumela wocwaningo olunzulu mayelana nodaba lobulili bukaCaster.
Nalapho i-IAAF yaphuma nomthetho othi lo msubathi akaqhubeke agijime nabasubathi besifazane.
I-IAAF kuthiwa lo mthetho ewuhlongozayo kulindeleke ukuba uqale ukusebenza ngoLwezi (November).
Kuthiwa lo mthetho uma kwenzekile waphumelela uzogadla kakhulu kuCaster.
Kuthiwa uCaster uma efuna ukuqhubeka nokugijima kuzomele athathe amaphilisi athile ukwehlisa ama-hormone akhe noma ashiye phansi.
Kwenzeka lokho nje, abasubathi abaningi bakhombise ukungakuthokozeli ukugijima noCaster, bathi ama-hormone anawo amnikeza amandla.
UGilbert Koech waseKenya ubhale ekhasini leFacebook ukuthi i-IAAF neCAS kufanele ilusukumele ngokushesha udaba lobulili bukaCaster. Uthi kakukho ubulungiswa ukuba uCaster agiji- nyiswe nabesifazane.
ILANGA lithinta uMengameli weSouth African Sports Confederation and Olympic Committee (Sascoc) uGideon Sam, ushaye ngamafuphi wathi ngokwazi kwakhe udaba lobulili bukaCaster sebaluqeda. Uthi kasikho isidingo sokuthi kulokhu kubuyelwa kulona njalo uma kunemidlalo kazwelonke.
Nomengameli weAthletics South Africa (ASA) u-Aleck Skhosana uthe-IAAF yalulungisa udaba lobulili bukaCaster. Uthi okubalulekile wukuthi uCaster agijime ephule amarekhodi njengoba enza. Uthi okunye abanaso isikhathi sakho ikakhulukazi abantu abanomona.
UCaster kusalindeleke lukhulu kuyena njengoba kuzokuthi namuhla ngoLwesine agijime imidlalo yokuhlunga kwi-800m okuyibanga lakhe nalapho ebhekwe ngabomvu ukuba abuye nelinye igolide.