Uzosebenza exoshiwe uSteve Komphela
Noma angayinqoba iNedbank Cup incwadi yokumxosha isiphumile
UZOSEBENZA esazi ukuthi uxoshiwe umqeqeshi weKaizer Chiefs ebhinjelwa yizinto kulezi zinsuku.
IChiefs izobhekana nePlatinum Stars kowe-Absa Premiership ngeSonto ngo-15h00 eFNB Stadium, eSoweto.
Lo mdlalo bekufanele ugijinywe ngoMgqibelo kusihlwa kuyo le nkundla kodwa wahlehliswa ngenxa yomngcwabo kaWinnie Madikizela-Mandela, obeyisishoshovu somzabalazo, ozokuba ngoMgqibelo e-Orlando Stadium, eSoweto.
Lo mdlalo ubhekwe ngabomvu njengoba la makilabhu ebhekene nengcindezi.
IChiefs isanethemba lokuthi ingasinqoba isicoco seligi, kanti iPlatinum yona ilwela impilo yayo njengoba ibambe ibhuleki emsileni we- log.
IChiefs iya kulo mdlalo nje, simapeketwane isimo njengoba abalandeli bayo bebesho ukumudla luhlaza umqeqeshi uSteve “Mphathi” Komphela noBobby Motaung oyimenenja jikelele yeChiefs emuva kokuba le kilabhu ibhudluzwe ngo-3-0 yiChippa United ngeledlule eFNB Stadium.
Leli phephandaba lithole ngomthombo ukuthi uKomphela usebenza nje, useyitholile incwadi emazisayo ukuthi usexoshiwe.
Kuthiwa kule ncwadi utshelwe ukuthi ngeke ivuselelwe inkontileka yakhe futhi bamfisela inhlanhla lapho eya khona.
“IChiefs bekufanele imxoshe uKomphela kubambe okwesikhashana uPatrick Mabedi ongumsizi wakhe no-Arthur Zwane ocija iqembu leMultiChoice kodwa yabona ukuthi ngabe kayenzi ubulungiswa kufanele asale eseqedela imidlalo yeNedbank Cup njengoba esefake ikilabhu kwi- semi final.
"Kodwa usebenza nje, useyazi ukuthi usexoshiwe uqedela lezi zinyangana bese ehamba. Noma angayinqoba iNedbank ngeke esasizakala incwadi isingakuyena futhi uyisayinile,” kusho lo mthombo.
UBobby uthe akukho azokuphawula okungaphezu kwalesi sitatimende abasikhiphe ngoLwesibili. Uthi basazoqhubeka nokumeseka umqeqeshi kuze kuphele isizini.
Lesi sitatimende besikubeka kucace ukunganami kweChiefs ngemiphumela engemihle etholwa yile kilabhu.
Sikubeke kwacaca ukuthi zikhona izinguquko ezizokwenziwa uma sekuphele
isizini.
IChiefs bekufanele imxoshe uKomphela kubambe uMabedi noZwane...