I-NATU IVEZA OKUSHAQISAYO NGOMNYANGO WEMFUNDO
UNkk Motshekga usejube uphenyo
KUVELE izinsolo zokuqhwagwa kwezikole imali yokubhekelela izidingo zazo okuthiwa kwenziwa wuMnyango wezeMfundo KwaZuluNatal, ukwenza lokhu uthi ulandela umthetho obekwe kuzwelonke kanti usenga ezimithiyo.
Kunezindaba ezishaqisayo zokuthi kunezikole ezinikezwe imali encane ngenxa yokuthi kunabafundi abangabaliwe ohlwini lokwabelwa inkece ngoba bengenazo izitifiketi zokuzalwa.
Kuthiwa le mali ibidliwa njengoba uNgqongqoshe wezeMfundo eyisiSekelo kuZwelonke, uNkk Angie Motshekga ekhuze umhlola ethi kakulona iqiniso ukuthi umfundi ongenaso isitifiketi sokuzalwa akabeliwe imali. Lezi zindaba zidalulwe yiNational Teachers' Union (Natu) esigcawini sabezindaba izolo ngeSonto, eThekwini.
INatu iveze ukuthi uMnyango wezeMfundo kuZwelonke wabela umfundi ngamunye imali engangoR1 242 ezikoleni ezingaphansi kukaQuintile 1, 2 no-3 kodwa umnyango kulesi sifundazwe uyayinconzula wabele umfundi imali engangoR955 bese kuthi laba abengenabo omazisi bangatholi ngisho isenti - bangafakwa kwisabelo saleso sikole.
Isekela-mengameli leNatu, uMnu Allen Thompson, lithi isikole sinikezwa imali ngokwesibalo sabafundi ababhalisile.
“Abanye othishanhloko kuhlule noma sebeya emnyangweni wezase- khaya babuya nezincwadi eziqinisekisa labo bafundi (abangenabo omazisi) kodwa umnyango kawuvumanga ukukhokhela izikole imali.
“Imfundo izothuthuka kanjani uma imali yokuthenga izinsiza-ku- sebenza idliwa ngabathile, ingafiki ezikoleni?" kusho uMnu Thomspon.
Uveze ukuthi sebethola nezikhalo kubazali abaziphonsa kothishanhloko ngokunikezwa kwezingane ezincane imisubelo, osekuphoqa ukuba bona (abazali) bachazele izingane ngocansi.
Uthi le misubelo kuyaphoqa ukuba othisha bayinikeze zonke izingane ngenxa yokuthi miningi, kakhulu kugcina kungasekho ngisho isikhala esanele emagunjini ezikoleni.
“Izingane sezidlala ngayo le nto emakhaya. Esikufunayo wukwazi ukuthi le misubelo igaywe kuphi, igaywa ngubani, sitshelwe nezindlela zokusetshenziswa kwayo nosuku ephelelwa ngayo isikhathi.
“Le nto ibeka izingane engcupheni yokuba uma zibhekana nenkinga ngabe kuzokhulunywa nobani ngoba ngisho iSouth African Bureau of Standards (SABS) kayizange iyiphasise ukuba isetshenziswe,” kusho uMnu Thompson.
Ngesikhathi kuqala uhlelo lwemisubelo, belubekelwe imali engango-R20 million kodwa iNhloko yoMnyango wezeMfundo KwaZuluNatal, uMnu Enoch Nzama, ithe igcine isifinyelela ku-R109 millon ngoba kwande isibalo sabafundi okubonakale ukuthi bayaludinga lolu sizo.
UMnu Thompson uthi ngokujwayelekile ezintweni ezifana nalezi, kusetshenziswa uSection-27 lapho kuvunyelwa osomabhizinisi ukuba bafake isandla, hhayi ukuthi kuthathwe imali yemfundo.
UNkk Motshekga usevumile ukwenza uphenyo olunzulu KwaZulu-Natal. Ujube ithimba kuzona zonke izinto eziphakanyiswe yiNatu emhlanganweni wayo naye obusePretoria mhla zingama-28 ngenyanga edlule.
UMnyango wezeMfundo KwaZulu-Natal ukhiphe isitatimende wathi usuzwile ngezinsolo ezivezwe yiNatu, wathi uzophendula uma usuzibheke kabanzi. Uthe uyakholelwa ekuholeni ngeqiniso nokubeka izinto obala.