"Ufela ukungahambisani nezimfuno zeSadtu uNtuli"
UNkz Caluza uthi kungcoliswa igama lenhlangano
USOLA amanga nokuhudulelwa odakeni kwegama leSouth African Democratic Teachers' Union (Sadtu), KwaZulu-Natal, unobhala wayo, uNkk Nomarashiya Caluza, emuva kokuba kuvele imibiko yokuthi kunezikole ezibangwayo esifundeni uMlazi, - inyunyana yakhe kuthiwa ingene yathi shi kulo mbango.
Umthombo weLANGA uthi bekuphoqwa uMnu Bheki Ntuli - osanda kwesula kwesokuba ngumqondisi esifundeni sezemfundo saseMlazi - ukuba afake othisha abangamalungu aqavile kwiSadtu ukuze bashaye amaphiko kulezi zikole.
Lezi zikole yiNgqayizivele Primary, yiTholisu Primary ne-Okumhlophe High School. Umthombo uthi eNgqayizivele kunesikhala sesekela likathishanhloko kanti iSadtu ibifuna kufakwe kusona unobhala wayo kwelinye lamagatsha ayo aseThekwini.
E-Okumhlophe kubangwa isikhala sikathishanhloko kanti naseTholisu kunesikhala sikathishanhloko. Umthombo weLANGA uthi e-Okumhlophe kuze kwazanywa nokugwazelwa isigungu esilawula isikole ngo-R70 000 kodwa sawuchiliza ngenhlanekezela lo mgwazo.
Uthi lolu daba lubikiwe ezikhulwini zoMnyango wezeMfundo KwaZulu-Natal eMgungundlovu, kodwa kalukho uphenyo olwenziwe ngalokho. "Kakulona iqiniso ukuthi uBheki Ntuli akawenzi kahle umsebenzi wakhe kodwa ufela ukuthi akahambisani nezimfuno zeSadtu zokuba angenelele ekubeni ashintshe nabahloli benze ngale ndlela efunwa yiyona,” kusho umthombo.
Esinye isikhulu esisebenza ngaphansi kwesifunda uMlazi, sithi kakusilona iqiniso ukuthi uMnu Ntuli akasebenzi ngoba isifunda sakhe kasikaze sithole ngaphansi kwama70% uma kubhekwa imiphumela kamatikuletsheni.
Sithi izinxushunxushu ezenziwa yiSadtu, yimizamo nje yokuqumba phansi uMlazi.
“Kuyiqiniso elimsulwa ukuthi kakukho okungenziwa ngabaphathi bomnyango ngoba nabo besaba ukubhekana neSadtu. Kayikho imihlangano (yesifunda uMlazi) esike yabakhona kulo nyaka ngoba bekuvele kuhloswe ukuba kuphazamieke ukuze uNtuli ezobukeka njengomuntu ongasebenzi,” kusho lesi sikhulu.
UNkz Caluza uthi akukho abakwaziyo ngokubangwa kwalezi zikole ezintathu.
“Kunabantu abahlale beqamba amanga bengcolisa iSadtu," kusho uNkz Caluza.
Okhulumela uMnyango wezeMfundo KwaZulu-Natal, uMnu Muzi Mahlambi, uthi udaba lukaMnu Ntuli luphakathi kwakhe nomqashi. Uthi ngeke bakhulume ngalo kuze kube kushaya isikhathi sokuba kufikwe emaphethelweni alo.