INJABULO KUFAKWA I-INTERNET ESIKOLENI SASEMAKHAYA
KABAKHOLWANGWA abafundi baseBizimali High School, eNkandla, maphakathi neKwaZulu-Natal, betshelwa izindaba zokuthi bazofakelwa umaxhobelalwazi ( internet) yamahhala esikoleni sabo ezoqala ukusebenza maduze.
Ngeledlule uMasipala waseNkandla, oholwa yimeya uMnu Thamsanqa Ntuli, ubuyokwethula ngokusemthethweni usonkontileka ozokwenza lo msebenzi ukuze kuthuthukiswe kakhulu izinga lokuphasa kwalesi sikole - esivele sigila izimanga kumatikuletsheni yize ugesi kungabasemzini kusona.
Lolu hlelo luzohlomulisa nezinye izikole zakule ndawo okuyiVelangaye Comprehensive High, yiLushaba High neBhuqwini High okuyizikole ezenze kahle kakhulu kumatikuletsheni ngonyaka ophelile.
UMnu Ntuli uthe lena yimizamo yokusiza abafundi nokulekelela othisha.
“Bekushayisa ngamahloni ukuthi izikole eziphasa kahle kangaka kazinayo i- internet. Umasipala uhlale phansi wabona kuyisu elihle ukwenza lokhu,” kusho uMnu Ntuli
Uthi ukufakwa kukamaxhobelalwazi kulezi zikole kuzokwenza ukuba kuvaleke igebe phakathi komfundi osedolobheni nosemakhaya.
Uveze nokuthi kubalulekile ukuba umnyango wezemfundo umbonge esaphila uthishanhloko waseBizimali, uMnu Ntandoyakhe Ntuli, ngenxa yokuphakamisa imfundo emakhaya nokukhiqiza odokotela abafunde kulesi sikole.
“Lesi sikole kasisamele nje iNkandla kuphela kodwa nesifundazwe siyaziqhenya ngaso ngokusebenza kwaso kanzima,” kusho uMnu Ntuli.
Uthi lo maxhobelalwazi uzokwazi ukusiza nabantu abakhe eduze nalezi zikole ezizohlomula.
UMnu Ntandoyakhe Ntuli onguthishanhloko waseBizimali, ubonge ukwesekwa kwesikole nokukhathalela imfundo yabantwana baseNkandla.
NgoNdasa (March) wonyaka odlule, uMnu Jacob Zuma obengumengameli waseNingizimu Afrika- uxhase othisha abalinganiselwa kwabangama-60 bakulesi sikole ngama- laptop.