UGILA IZIMANGA ENYUVESI ONGABONI
UGILA izimanga owesilisa waseMsinga, maphakathi neKwaZuluNatal, ongaboni, ozokwethweswa iziqu zeMasters e-University of KwaZulu-Natal (UKZN) mhla zingama-24 kwephezulu.
UMnu Sithabiso Zulu (35), olimale engozini yemoto eminyakeni eli10 edlule wagcina engasaboni, uthi ukungaboni kakufanele kwenze umuntu angabe esalifezekisa iphupho lakhe.
Utshele ILANGA ukuthi uqale ukungaboni eqeda umatikuletsheni ngonyaka wezi-2008, wahlala ekhaya unyaka wonke ezama ukwamukela isimo esimehlele.
Ubenenhlanhla wathola usonhlalakahle omsizile wamfaka esikoleni sabangaboni eMgungundlovu, maphakathi neKwaZulu-Natal wayofunda i- braille.
“Ngemuva kwalokho kangibange ngisabheka emuva. Kuthe ngisengqungqutheleni yabakhubazekile, besitshela ngemifundaze enikezwa abakhubazekile, kangibange ngisalinda, ngifake isicelo sokufunda e-University of KwaZulu-Natal.
“Kakuphelanga sikhathi esingakanani bangithatha kanti ngalowo nyaka ngizoba nenhlanhla yokuthola nomfundaze eMnyangweni wezokuBusa ngokuBambisana ongifundise iminyaka emithathu ngenza iBachelor of Social Sciences.
“Ngiqhubekile ngenza iHonours ngayiqeda ngimeja ngesiZulu njengoba manje sengenze iMasters engizothweswa kuyona iziqu,” kusho yena.
Uthi kumanje wenza unyaka wokuqala kwiPhD (Philosophae Doctor). Uthi usanda kuthola indondo yokwenza kahle ezifundweni zakhe njengoba ephasa ngo-A kweziningi.
“Ngifisa ukuthola umsebenzi wokufundisa e-University of South Africa (Unisa) ngifundise isiZulu noma ngisebenze emnyangweni wezobuciko namasiko.”
Uthi esaqala ukufunda kakubanga lula kwazise ubengakaze ayicofe ikhompyutha. ‚
"Ngesikhathi ngenza iMasters bekufanele ngifunde izincwadi ezingama-56. Bengiba nenkinga ngoba bekufanele ngicele abantu bangifundele ngoba kangikabi nawo lo mshini okwazi ukubeka kuwona incwadi, ukufundele bese ukutshela ukuthi vula ikhasi elilandelayo.
"Mina ngisasizwa ngabantu. Kuba yinkinga uma umuntu esefuna ukuyolala kanti mina ngisafuna ukuqhubeka ngifunde.”
Uthi abantu abangaboni kakufanele bazibukele phansi ngoba kayikho into abangahluleka ukuyenza.
“Umuntu ongaboni uyakwazi ukuzwa ngezandla. Ngisho uthenga isinkwa esitolo uyakwazi ukusizwa ukuthi lesi sinsundu noma simhlophe. Umbhede ngiyazindlalela ,” kusho uMnu Zulu osevule nenhlangano esiza abangaboni ukuba bakwazi ukuzimela.
Okunye akwazi ukukwenza wukushaya isigingci naso athi usifunde engasaboni. Uthi useke amenywe emicimbini ayonandisa.