KUBHEKWE ISIGWEBO ESIQINILE KWELABADUBULA AMAPHOYISA
UNXUSE ijaji ukuba liqinise isandla uma seligweba abasolwa abathathu ecaleni lokudubula amaphoyisa amabili kwashona elilodwa eNanda, eThekwini, mhla zingama-22 kuMandulo (September) wezi-2015 umshushisi obenza izethulo eNkantolo eNkulu yaseThekwini.
Abamangalelwa nguMnu Sabelo Mkhize (29) ongummangalelwa wokuqala, uMnu Lindokuhle Mchunu (21) wesibili noMnu Sboniso Khubisa (22).
Babhekene namacala ali-12 okubalwa elokubulala ngenhloso uSgt Vusmuzi Moyana, elokuzama ukubulala uSgt Jabu Jojisa, elokutholakala nezibhamu ezingekho emthethweni, elokuthumba, elokuphula umthetho wezibhamu nelokukhomba amaphoyisa nge-AK 47.
Ngesikhathi enza izethulo zakhe kwinkulumo-mpikiswano ebiphakathi kombuso nabameli babamangalelwa u-Adv Monde Mbaqa, ucele ibamba lejaji, u-Adv Xolile Ntshulana ukuba liqinise isandla ngoba abamangalelwa lokhu abakwenzile bakwenze ngenhloso futhi kabatshengisi ukuzisola ngakho.
Ubekele inkantolo ukuthi umbuso unokufakazi obuqandula ikhanda njengoba kutholwe imifaniswano yamaphoyisa nezibhamu zawo kubamangalelwa.
“Bonke ubufakazi bukhomba bona kanti nofakazi bombuso bethule ubufakazi obuqandula ikhanda enkantolo. Abamangalelwa kumele bagwetshe udilikajele umuntu ngamunye ngamacala aba- wenzile ukuze inkantolo izothumela umyalezo oqinile nakwabanye abacabanga ukwenza into efana nale,” kusho u-Adv Mbaqa.
Uthi ngosuku lwesigameko, abamangalelwa bazame ukokhela ngo- mlilo iveni yamaphoyisa ebihamba uSgt Moyana noSgt Jojisa njengoba bebethi bacisha ubufakazi.
Ummeli kaMnu Mchunu, u-Adv Sphiwe Ndlela, uthe ikilayenti lakhe kumele liphume phambili kuleli cala ngoba libhecwa ngobende inyama lingayidlanga.
“Umbuso wehlulekile wukuletha ubufakazi obuqinile obuveza ukuthi ikilayenti lami liyathinteka kuleli cala,” kusho u-Adv Ndlela.
Ummeli kaMnu Khubisa, u-Adv Mlungisi Sabela, utshele inkantolo ukuthi ikilayenti lakhe limsulwa, liboshelwa amanqina enyathi futhi kumele liphume phambili ecaleni.
“Ikilayenti lami kalihlanginise lutho naleli cala, ubufakazi bombuso buntekenteke njengoba uhlulekile wukuveza ubufakazi obuqandula ikhanda mayelana nokuthinteka kwekilayenti lami kuleli cala,” kusho u-Adv Sabela.
U-Adv Ntshulana utshele inkantolo ukuthi uzodinga isikhathi esanele ukucubungula leli cala ukuze ezokhipha isinqumo esifanele ngalo. Uthe isinqumo uzosikhipha mhla zimbili kuNtulikazi (July) nonyaka.