Indida ngobulawe wakhishwa ugebhezi
Umfanyana ubesemadlelweni eluse izinkomo nomngani
KUDUMA amakhanda emndenini wakwaDeyi, eMlolweni, eHarding, ngokubulawa ngesihluku kwendodana yawo isekwaluseni, yakhishwa ugebhezi.
ILANGA lithole ukuthi uMalwande Deyi (11) ubulewe esemadlelweni eluse izinkomo nomngani wakhe, u-Abongwe Jojisa alingana naye.
Isidumbu sakhe sitholwe kuzosa kube yiSonto lomhla ziyisi-8 kwephezulu singenalo ugebhezi. Kuthiwa kuthe uMalwande noAbongwe besahleli emasimini aphesheya komfula uMthavuna, izinkomo ziklabe zigudla umfula, kwaqhamuka owesilisa ongaziwa endaweni egqoke i- tracksuit emnyama, egaxe ubhakha omnyama, wayohlala nabo elokhu ebancokolisa.
UNkk Ntombi Deyi, ongunina kaMalwande, uthi lona wesilisa kuthiwa uthe ucela bamsize bamkhombise umuthi okuthiwa inhloboshane - esho umuthi okhiwa emahlathini athe ukuqhela nalapho kade bekhona.
Uthi bamtshele ukuthi lo muthi kawukho kula mahlathi abewasho, bamkhombisa lapho ukhona wathi ucela bamphelezele bayomkhombisa. Uthembise ukubapha imali abeyigxishe emasokisini.
"Izingane zihambe naye, okuthe besendleleni wathi ucela zimkhombise lapho kudotshwa khona. Uma befika emfuleni, uvele wakhipha ucelemba nesando kubhaka. UMalwande ushiye u-Abongwe nalo muntu wathi usayonqanda izinkomo.
"Usheshe wabuya ngoba bezingakahambi kakhulu. Bahlalile nalo muntu elokhu ebancokolisa. Kuthe emuva kwesikhashana, wahamba u-Abongwe wayobheka izinkomo kwasala uMalwande nalo muntu.
"Uthe esebuya eyombheka, wangabe esababona lapho kade behleli khona. Umemezile wangasabela, waze wabuya wazombheka lapha ekhaya. Ufike lapha ekhaya esehamba noninakhulu beqhuba izinkomo, bebuza ukuthi akafikanga yini uMalwande.
"Siphumile sayombheka ngasemfuleni lapho u-Abongwe ebashiye khona. Ngivele ngaphelelwa ngamandla, sahlala ngasemfuleni nomakhelwane, aqhubeka amadoda. Athe esebuya asitshela ukuthi umfana ukhona, lo muntu umlimazile," kusho uNkk Deyi.
Uthi ikhanda belingaphandle kwamanzi, likhishwe ugebhezi, isidumbu siphakathi. Uzwakalise ukuthi ubuhlungu ngento emehlele ngoba akazi ukuthi ubenzeni umntanakhe aze abulawe ngesihluku esingaka.
"Imoto yezidumbu ibisiwacosha ematsheni amathambo ekhanda. Uzongcwatshwa engasaphelele umntanami,” kusho uNkk Deyi. Uthi ufisa ukuba umthetho wenze okufanele kumenzi wobubi ngobulwane abenzile enganeni yakhe.
Okhulumela amaphoyisa KwaZulu-Natal, uLt Colonel Thulani Zwane, uthe amaphoyisa avule icala lokubulala ngokufa kukaMalwande.
Uthi kuboshwe owesilisa oneminyaka angama-32 ngaleli cala kanti uzovela eNkantolo yeMantshi yaseHarding maduze.
Uthe esebuya eyombheka, wangabe esababona lapho kade behleli khona...