Abamatekisi banikelele abafundi abahlwempu
Ngomfaniswano wezikole ezingama-20 ezakhele iZululand
SIHLANZE igama lemboni yamatekisi - edume ngezidumo zezibhamu nezingozi - isiyingi seSouth African National Taxi Council (Santaco) saseZululand, sikhipha osizini imindeni ehlwempu ngokunikela ngomfaniswano wesikole ezinganeni zezikole ezahlukene.
Lokhu kwenzeke emcimbini obusehholo lomphakathi, iCecil Emmett, eVryheid ngoLwesine olwedlule. ISantaco Zululand Region iyingxenye yeziyingi ezili-16 zeSantaco KwaZulu-Natal kanti inososeshini abali-11 komasipala abayisihlanu abangamankonyane kaMasipala wesiFunda iZululand.
Labo masipala yiDumbe, uLundi, KwaNongoma, abaQulusi noPhongolo. Kulabo soseshini baseZululand abali11, kunamakomiti ali-10. Ososeshini yilaba; yiBabanango, iGluckstadt, iHlahlindlela, Ikhwezi (Phongolo) Ikhambi, Louwsburg, iZamokuhle (Dumbe), iMondlo, iMahlabathini-Ulundi, KwaNongoma neVryheid.
USihlalo weSantaco Zululand Region, uMnu Sibusiso Zwane, uthi emhlanganweni obusezingeni lesifundazwe, baphonselwe inselelo ukuba kube khona abakwenzayo ezindaweni zabo, kokubuyisela emiphakathini abasebenza kuyona.
Uthi wethule esifundeni sabo umbono wokuba kunikelwe ngomfaniswano wesikole kubafundi abaswele ezikoleni ezingama-20 abazakhele.
La makomiti ali-11, ngokusizwa ngothisha, akwazile ukuhlonza abantwana abaswele, obekumele kuqalwe ngabo ukunikelelwa.
Balinganiselwa ema-500 abafundi abahlomulile kulolu hlelo.
UMnu Zwane ubonge neqhaza lomalume, abathutha abafundi, nabo abafake isandla kuyo yonke into ebiyenziwa njengoba sebesebenza ngaphansi kweSantaco.
Uthe lokhu abakwenzile bazokwenza nangonyaka ozayo, kodwa kuzobhekwa abanye abangatholanga kulo nyaka. Abanye ababambe iqhaza kulesi sihe sosomatekisi kube yilezi zinkampani ezisebenzela eVryheid: Mercedes-Benz, Spares For You, Boxer, NTT Toyota, Ossies Tyres, Ithala Bank kanjalo neKhondlo Brokers.