Sihlonishwe ngendondo isilomo soKhozi FM
SIHLONISHWE ngendondo yeHall Of Fame isilomo somsakazi woKhozi FM, uDudu "Lady D" Khoza, emcimbini weLiberty Radio Awards obungoMgqibelo kusihlwa, eGoli.
ULady D, osebe kulo mkhakha wezokusakaza iminyaka engaphezulu kwengamashumi amabili, uklonyeliswe ngale ndondo nezinye izinkakha emsakazweni okubalwa kuzo uWilson B Nkosi ongumsakazi weMetro FM, uThuso Motaung ozakhele udumo kwiLesedi FM, uPhumzile Mnci ongumphathi siteshi woMhlobo Wenene nabanye.
Kulo mcimbi wokuklomelisa imisakazo nabasakazi kuphinde kwaklonyeliswa nabanye abasakazi nezinhlelo ezenza kahle kulo mkhakha.
Kwabanye abagoduke nemiklomelo kubalwa laba abalandelayo:
UBongani Mtolo we-East Coast Radio, emunxeni we-Afternoon Drive Presenter - Commercial;
Uhlelo lwantambama kwiMetro FM, iThe Drive, olushayelwa nguMo Flava noMasechaba Ndlovu, emunxeni weAfternoon Drive Show - Commercial;
UMfundo Mabaso ongumdidiyeli wohlelo lwezindaba kwiGagasi FM, Indaba, olushayelwa ngu-Alex Mthiyane, emunxeni we-Content Producer - Commercial;
Uhlelo lwesiteshi somphakathi iKhwezi, iNight Time Crew, emunxeni we-Music Show - Community;
Uhlelo lomculo wokholo kwiVuma FM, iSunday Gospel Show emunxeni we-Music Show - Commercial;
Uhlelo lwezemidlalo kwiMetro FM i-The Ultimate Sport Show obelushayelwa u-Udo Carelse kodwa oselushayelwa uThomas Mlambo, emunxeni we-Sports Presenter - Commercial; nabanye.