IHLAZO KUGINGQELWA AMAKILABHU EMOTSEPE LEAGUE
IHLAZO kugingqelwa amakilabhu amabili agijima kwiSouth African Football Association (Safa) KwaZulu-Natal ABC Motsepe League emidlalweni abehlelelwe yona ezinkundleni ezahlukene kulesi sigaba.
ILANGA lithole ukuthi kugingqelwe iKwaDukuza FC obekumele ivakashele iMilford FC ngoMgqibelo eMhlathuze Sports Complex O/F, eRichards Bay.
Bese kungokwesibili ihluleka ukuya enkundleni kwazise nangoLwesithathu kayilubhadanga emdlalweni neKwaMashu All Stars, KwaMashu.
Omunye umdlalo ongazange ube khona ngoweDrakensburg FC ethole amaphuzu agcwele ingazange iwajulukele ngenxa yokuthi iLadysmith United kayifikanga enkundleni. Lo mdlalo bekumele ugijinywe ngoMgqibelo eMbali Ground No 1, eMgungundlovu.
UMvoti FC unqobe i-Ashley United ngo-1-0 koweligi ngoMgqibelo ntambama e-SJ Smith Stadium.
Lo mphumela wenze ezikaBheka “Mlisa” Phakathi ocija uMvoti FC zaqeda zinamaphuzu angama-73 okuyinto engakaze yenzeke kulesi sigaba.
Kusenjalo, uKenny Ndlazi ocija iHappy Wanderers uhlele inhlolokhono yabadlali eqala ngoLwesine nangoLwesihlanu kusuka ngo-11h00 ekuseni, iphe- le ngo-14h30 oGwini Sports Complex, ePort Shepstone.
Kule nhlolokhono kudingeka abadlali abaneminyaka engaphansi kwama-21 ubudala.
Umdlalo wokugcina kulesi sigaba uzokuba phakathi kweMaritzburg City neSes’Khona FC edonsa ngodizili, ngoLwesithathu ngo-15h00 eNorthdale Stadium, eMgungundlovu.
Imiphumela yangempelasonto yeSafa KZN ABC Motsepe League ihambe kanje: Juventus 1, Dynamos 0; Wanderers 3, Ses’Khona 0; Friends 2, Natal 0; Ashley 0, uMvoti 1; Pmb City 2, Dbn FC 0. EyangoLwesithathu: Natal 0, uMvoti 1; Dbn 0, SesKhona 1; KwaMashu 2, KwaDukuza 0.