Usanukelwa umsizi osinde ethaveni
Zehle mi esebona abangani bakhe bengasanyakazi
ZEHLE mi izinyembezi kowesilisa waseLamonti, eMargate, othi ogejwe yinhlamvu ngesikhathi behlaselwa endaweni yokucima ukoma ngoMsombuluko ebusuku, kwabulawa abangani bakhe abane.
UThemba (okungelona igama lakhe langempela, ukumvikela) uphume engenamyocu kulesi sigameko, esenzeke eMama's Tarven khona eLamonti, uthi akazi usinde kanjani njengoba ephaphame elele phakathi kwezidumbu zabangani bakhe.
Utshele ILANGA ukuthi iphunga lomsizi wesibhamu esidubule sabulala abangani bakhe usalizwa namanje. Kulesi sigameko kushone uMnu Prince “Ze” Phehlukwayo (31) - okunguyena obedayisa ethaveni - uMnu Andile Khowa (25), uMnu Siyabonga Dindikazi (36) noMnu Njabulo Ndovela (32), yena oshonele esibhedlela.
Abanye babafi bebeyizihlobo. “Bese kuntambama sihleli ngaphandle kwasethaveni sishaya iziphuzo ezibandayo, abafowethu besanda kubuya emsebenzini ngesikhathi sihlaselwa ngabantu ababili abebezifihlile ebusweni.
“Laba bafana baqhamuke isibhamu besiphethe ngesandla, omunye ephethe ummese. Kuthe nje beqhamukela kithina, baqala baqhumisa isibhamu besibhekise phezulu. Besizitshela ukuthi bayadlala noma bayasethusa kanti sizobulawa,” kusho uThemba izinyembezi zizehlela.
Uthi babaphoqe ukuba bangene ngaphakathi ethaveni, babayalela ukuba balale ngezisu bangababuki ngoba bazobasakaza ubuchopho.
“Sonke besibheke phansi sibezwa bekhuluma noZe bethi makakhiphe yonke imali ekhona esitolo, sezwa kukhala namabhodlela otshwala. Ngaleso sikhathi besebezithathela amabhodlela otshwala nokunye okudayisayo ethaveni,” kusho yena.
Uthi abasolwa sebeyitholile imali namabhodlela otshwala, uzwe kukhala umsindo wesibha- mu kuzwakala ukuthi siyahlohlwa, saqala saqhuma siphindelela wesaba ngisho ukuvusa ikhanda abheke phezulu.
Ngesikhathi isibhamu siqhuma, uthi ubezitshela ukuthi izigebengu zidubula phezulu seziyahamba, zenzela ukuthi bangazibheki njengoba kuthe zifika zasiqhumisa zasibhekisa phezulu.
“Mina bengilele phakathi nendawo, ngizwe sewuthule umsindo wesibhamu ngavusa ikhanda ngiqalaza ukuthi sebephumile yini.
“Ngimemeze uSiyabonga noAndile abebelele eceleni kwami, ngibatshela ukuthi mabavuke izigebengu sezihambile.
“Izinyembezi zigcwale amehlo kwangathi ngiphanjanelwa yikhanda ngibona abangani bami benganyakazi. Uma ngibabheka ezi- phundu bebenezimbobo zezinhlamvu zesibhamu ziphophoza igazi.
“Namanje ngisazibuza ukuthi ingigeje kanjani inhlamvu njengoba bebedubula bonke abantu nge- sikhathi sebephuma,” kusho uThemba.
Uthi abashonile besebefana nabafowabo ngendlela abebezwana ngayo, bejwayele ukuba uma sekuyizikhathi zantambama bahlangane bahlale ndawonye, bashaye iziphuzo ezibandayo.
Utshele ILANGA ukuthi uyakudinga ukwelulekwa ngokomqondo ngento ayibonile, kwazise uthi uma evala amehlo kubuya sonke isithombe sayo.
UMnu Senzo Khwela, iMama's Tarven okungeyakubo, uthi bekungaqali ukuba le ndawo ihlaselwe kodwa yisigameko sokuqala ukuthi kuze kubulawe abantu.
“Kwake kwenzeka kwafika izigebengu zathatha imali notshwala kodwa kwangalimala muntu. Sidlale i- video ngemuva kwesigameko, sababona abasolwa, omunye wabo ngumuntu owaziwayo endaweni," kusho uMnu Khwela.
ILANGA lithole ngamalungu omphakathi ukuthi omunye wabasolwa uyaziwa endaweni ukuthi ubamba inkunzi, udume ngokuthi uma ebamba umuntu inkunzi, uyambulala uma esethole akudingayo.
Umphakathi wakule ndawo ububonakala ukuthi usethukile ngalesi sigameko njengoba uthi kuyaqala ukuba kubulawe abantu abaningi kangaka ngesikhathi esisodwa.
Okhulumela amaphoyisa KwaZulu-Natal, uCapt Nqobile Gwala, uthi amaphoyisa asebophe umsolwa oyedwa ngalesi sigameko. Uthi ubanjwe erenki yamatekisi esebaleka endaweni, utholakale nesibhamu esinezinhlamvu eziyisi-7, okusolakala ukuthi yisona asisebenzisile ngesikhathi kubulawa.