Unovalo uPitso ngezinga lePMB Utd
Ukhiye wokunqoba ulele kubadlali abasebancane
KUXEGA amadolo kumqeqeshi weMamelodi Sundowns uPitso “Jingles” Mosimane uma ecabanga ngezimbangi zakhe njengoba ekholwa wukuthi ziyingozi uma uzibhayizela.
IDowns izogadulisana neMaritzburg United kwi- semi final yeNedbank Cup ngeSonto ngo-15h00 eHarry Gwala Stadium, eMgungundlovu.
IDowns iya kulo mdlalo nje, iyasidedela isibhaxu njengoba emidlalweni yayo eyisihlanu eyedlule iqongqothe kwasani.
Iguqise ngo-1-0 iLamontville Golden Arrows kowe-Absa Premiership ngoLwesibili kusihlwa eLoftus Stadium, ePitoli.
Nokho ibhekene neMaritzburg engagayelwa mphako, engashayi kodwa ebhaxabulayo.
IMaritzburg iya kulo mdlalo nje, ngeSonto ntambama iguqise ngo-20 iBaroka FC kowe-Absa Premiership ePeter Mokaba Stadium, ePolokwane.
UMosimane uthi iyamtatazelisa ifomu yeMaritzburg.
“UFadlu Davids oqeqesha iMaritzburg uyadinga ukushayelwa ihlombe ngomsebenzi omuhle awenze kule kilabhu.
"Ngendlela aseyijike ngayo uma uzobhekana nayo kufanele uqhamuke nesu eliphusile.
"Lo mdlalo uyangitatazelisa ngoba iMaritzburg iyinkinga ekhaya, iyashaya.
"Ngeke neze kube lula ukuyehlula ngoba isefomini.
"Sisefomini enhle kwathina singamelana nanoma iyiphi ikilabhu.
"Lo mdlalo uzofika siwulungiselele, ngethemba ukuthi kuzonqoba thina,” kusho uMosimane.
UDavids uthi bazimisele ngokuqopha umlando ngeSu- ndowns.
“Isifiso sokuqeda sikwi-top 8 kwiligi ngikholwa wukuthi sesisifezile osekusele manje wukuzibeka emlandweni wokungena okokuqala kowamanqamu walo mqhudelwano.
"Ngendlela esibe nesizini enhle ngayo, ngikholwa wukuthi kufanele sicoshe okuthile.
"Yilona thuba leli alikho elidlula lona.
"Siya kulo mdlalo ngenhloso yokuzifaka emabhukwini omlando.
"Nokho simelwe wudonga olunzima phambi kwethu okufanele silubhidlize.
"Kuzoba ngumqansa ukwehlula iSundowns kodwa kungenzeka.
"Okuhle nje wukuthi sizobe sidlalela phambi kwabalandeli bethu.
"Sizolwa kulo mdlalo, kuzonqamuka imilenze. Siyayidinga le wini,” kusho uDavids.
Ukhiye wala makilabhu wokunqoba ulele kubadlali bawo abasebancane ngeminyaka yobudala kodwa abangumgogodla.
KwiDowns kubhekwe kakhulu uPercy Tau (24) ongumgadli ovutha engabaselwe kulezi zinsuku.
Ngendlela alinyuse ngayo igiya ungathi isizini yima iqala.
Akasagcini nje ngokubhakuzisa inethi kodwa usedle ngamaphasi ayingozi akhipha ozakwabo uqekelele bese beqhufuza kalula amagoli.
KwiMaritzburg kubhekwe uSiphesihle “Mbesuma” Ndlovu (21) olihlikihla esiswini.
Ngendlela lo mdlali asibamba ngayo isisu kuvele kungakholakali ukuthi ngempela ngeyakhe le minyaka yobudala.
Usibamba sithule du amadoda amadala athi azama ukumuwisa kube yiwona afumbeka phansi, kanti uma eshoshela uyingozi ngoba uyayiboniswa nembobo yepali.
Ukuvuka emaqandeni kwalaba badlali kulo mdlalo yikhona okuzowenza ube seqophelweni eliphezulu.