Baphika eyelobolo kozaliswe uZuma
Neyokukhulelwa bayithole emaphephandabeni
UPHIKA eyelobolo umndeni wentokazi ebisematheni ngesonto eledlule ichazwa njengenkosikazi entsha kaMnu Jacob Zuma, obengumengameli waseNingizimu Afrika.
UNkz Nonkanyiso Chonco (25), obese kusabalele ukuthi zingase ziwushaye noma yinini phakathi kwakhe noMnu Zuma. ILANGA liziyele mathupha kwaChonco eMatolweni, eMatatiele ngenhloso yokuthola kabanzi ngalezi zindaba.
Lithole ukuthi okwamanje kazikho izinhlelo ezikhona zokulobola kukaMnu Zuma - ngokusho komndeni wale ntokazi, kanti nabantu endaweni bathi kabakaze bambone ngisho evakashile kulo muzi uMnu Zuma.
ILANGA lifice umakoti kuwona lo muzi wathi kazikho izinto eziphathekayo okwamanje ngaphandle kokuqinisekisa ukuthi uMnu Zuma ukhulelisile, kwatholakala indodana igama layo nguSakhumuzi Zuma. UMnu Thanduxolo Chonco, ongumfowabo omdala kaNkz Chonco, uthe izindaba ezifana nalezi zingaqala kuyena kodwa okwamanje kakukalotsholwa. Uthe mhlawumbe abakwaZuma basezinhlelweni zokuvela kulo muzi.
Utshele ILANGA ukuthi ubengazi nokuthi uNonkayiso uno-budlelwano noMnu Zuma, ngisho ukukhulelwa imbala.
“Lo muntu unomzimba omkhulu, akukho ebengikubona kuyena. Ngizwe sengitshelwa ngabantu lezi zindaba bezibona emaphepheni, bethi sengizokuba nomshana,” kusho uMnu Chonco.
Uku ncomile ukuziphatha kahle kwengane yakwabo, wathi izingane zamanje sezikhulelwa zineminyaka elinganiselwa kwewu-14 kodwa uNkz Chonco ukwazile ukuziphatha kahle waze wenzelwa umcimbi wokumbonga ngokuthi ubeziqoqile.
UNkk Nombuso Mokoena ongunina kaNkz Chonco, naye uhambe emazwini endodana yakhe, wathi kabakaze bathintwe ngezinhlelo zelobolo noma ukugeza umuzi. Zonke lezi zindaba ubezixo-xa ngesikhathi ethunga amaphinifa edolobheni eMatatiele, lapho esebenzela khona.
UNkz Chonco akamusha emehlweni abezindaba ngoba ubeyisishoshovu esaziwayo, ephambili ezintombini zoMkhosi woMhlanga nangesikhathi kunezinkulumo ezithi kumele uvalwe umhlanga.
ILANGA likhulumile naye uNkz Chonco wathi akasavumelekile ukuxoxa nabezindaba. Uthe zonke izindaba zakhe zixoxwa noMnu Ray Zuma kanti intatheli ihluleke yancama imncenga, washaya phansi ngonyawo.
Ngeledlule uMnu Ray Zuma ukhulume kwabezindaba wathi zikhona izinhlelo zomshado kodwa imindeni kumele ihlangane kuphunywe nesinqumo.
Le ntokazi izinze eBallito, eThekwini, yenza iziqu zobuntatheli eRosebank College. UNkz Chonco kuvela ukuthi udibane noMnu Zuma ngo-2013 ngesikhathi kukhankaselwa ukhetho lukazwelonke lwango-2014. Emuva kwalokho kuthiwa ubesevamile ukubonakala emzini kaMnu Zuma oseGoli.