UBONGA ILANGA NGOMAZISI
UTHI uyowakhohlwa elele ethuneni amandla eLANGA owesifazane okubikwe ngosizi lwakhe lweminyaka mayelana nenkinga kamazisi wakhe obumchaza njengomuntu ongasekho emhlabeni - okumanje ulinde umazisi omusha.
Oshicilelweni lwamhla zili-15 kuMasingana (January) kophezulu, ILANGA libike kabanzi ngosizi lukaNkz Ntombifuthi Msane (46) waseMboza, eMkhuze, enyakatho-mpumalanga yeKwaZulu-Natal, obecela usizo maqondana nenkinga eqale ukugubuzela impilo yakhe ngowezi-2013.
Uthi ubonga leli phephandaba ngokubika ngodaba lwakhe kwathinteka uMnu Sbabazi Gumede waseManaba, KwaMhlabuyalingana, ofunde lolu daba maqede wathungatha uNkz Msane ukuze ezohlanganisa ubufakazi ngendabuko yakhe.
UNkz Msane uthe akazi nokuthi yini okufanele ayenze phakathi kokuba athokoze noma akhale.
“Kuyintokozo kimi ukuthi sengizoba nepasi njengabo bonke abantu. Ebenginalo belingichaza njengomuntu osekukudala wadlula emhlabeni. Ngibonga kangiqedi kubaba uGumede. Ngibonga nokungenelela kwekhansela lewadi, ubaba uGwala (Johnson) obize ILANGA labhala ngosizi lwami, ukuba bekungenina, ngabe akangibonanga ubaba uGumede,” kusho uNkz Msane ongayiqedanga inkulumo yakhe, wakhihla isililo sentokozo.
UMnu Gumede - oyikhansela kuMasipala wesiFunda uMkhanyakude - uthe: “Ngithinteke kakhulu uma ngi-bona lolu daba ephephandabeni ILANGA (uNkz Msane) ecela usizo. Ngisebenzise ulwazi enginalo kwezomthetho ukuze ngimsize. Ngiqoqe yonke imininingwane efanele ngaya nayo ehhovisi laseMbazwana, ngakhuluma nezisebenzi zomnyango ukuze kulungiswe le nkinga.
Emuva kwalokho baqalile ba- lusebenza udaba. Lokhu ngikwenze ngoba kuyisibophezelo sami ukuba ngisize abadinga usizo olufana nalolu,” kusho uMnu Gumede. UMnu Gwala naye ubonge amandla eLANGA. “Nakuba kuyaye kungehli kahle kwabanye uma ngisebenzisa leli phephandaba ukuveza usizi lwabantu engibaholayo, ekugcineni kwakho konke, abantu bayasizakala.
"Kumanje baningi asebesizakele ngezindlela ezahlukene ngoba abaxhasi nosomabhizinisi bafunda ( ILANGA), babone izindaba zabantu abadinga usizo. Mangingahlonizi ukuthi makhulu amandla eLANGA ngoba kumanje sekusizakale iningi ngokwakhelwa izindlu,” kuphetha uMnu Gwala.