UMCIMBI WEZIQU USUZOTOLIKWA NGESIZULU
IDIDE abaningi ngeledlule i-University of KwaZulu-Natal (UKZN) iqhamuka neqhinga elisha lokuba kutolikwe ngesiZulu emcimbini wokwethweswa iziqu abafundi abaphumelele ngonyaka odlule.
Otolikayo ukhuluma kanye nesikhulumi esisuke sethula inkulumo ngaleso sikhathi.
Ngokusho kukaDkt Lolie Makhubu, ofundisa isifundo sokuhumusha e-UKZN, lokhu kwenziwe ngoba kucatshangelwa abazali ukuba bezwe okusuke kwenzeka emcimbini.
Uthi inhloso enkulu wukuba kuthuthukiswe isiZulu.
“Kunabazali abathamela umcimbi babone ingane yabo isiyokwamukela iziqu bengezwanga nokuthi bekuthiwani. Sifuna bakuzwe konke okukhulunywayo emcimbini, kutolikwe nangezandla,” kusho uDkt Makhubu.
Uthi kakubanga lula ukuba abaphathi beUKZN bakholwe wukuthi leli qhinga lizosebenza njengoba bekuthiwe makutolikwe usuku olulodwa. Nokho kakubange kusayekwa ngenxa yenjabulo kubantu ngalolu hlelo.
Kuzokhumbuleka ukuthi eminyakeni emithathu edlule le nyuvesi ikwenze kwaba yimpoqo kubo bonke abafundi abenza unyaka wokuqala ukuba benze isiZulu ngoba ithi sihamba phambili, ifuna nokugcina umlando wayo omuhle ngalolu limi.
UDkt Makhubu utshele ILANGA ukuthi inhloso yakhe enkulu wukuba kusungulwe iziqu zokutolika kule nyuvesi kwazise kazikho.
Okwamanje kwenziwa isifundo sokuhumusha ngaphansi kweziqu ezithile.
Le nyuvesi ibambe ufishi omkhulu ngokuthola uDkt Makhubu, obeyinhloko yomnyango wezokutolika nokuhumusha eDurban University of Technology (DUT), okuwumnyango ohlanganisa nezobuntatheli, wukuthwebula nezolimi. Ufike e-UKZN nyakenye.
EDUT nguyena ophembe iziqu zokutolika njengoba engungoti kuzona, engudokotela wezokutolika.
Umphathi we-UKZN, uDkt Albert Van Jaarsveld, uthe kuningi okwenziwa yile nyuvesi ukuze kuthuthukiswe isiZulu.