UYANCONCOZA OLEKELELWE WATHOLA IZIQU
UKHUTHAZWE wukukhula ngaphansi kwezimo ezinzima umfundi olekelelwe ngusomabhizinisi osemncane ukuze aphothule iziqu zomthetho e-University of KwaZulu-Natal (UKZN).
UMnu Lwazi Shandu (22), waseMandeni, utshele leli phephandaba ukuthi impilo beyinzima kakhulu kubo, okuyikhona okumgqugquzele ukuba afunde ngamandla ukuze alekelele umndeni wakubo uphume osizini.
Uthi kakubanga lula ngisho ukuyobhalisela ukufunda kodwa kwapataniswa kubo.
Uveze ukuthi uMnu Sandile Shezi wenkampani iGlobal Forex, osebenza ngokuhwebelana ngemali namanye amazwe aphinde afundise abantu ngalo msebenzi, ubambe iqhaza elikhulu empilweni yakhe.
Uthi ngelinye ilanga uxoxelwe ngomunye umngani wakhe ngeqhinga lokuzimela empilweni ukuze ahlangabezane nabazali bakhe ngendaba yemfundo yakhe.
“Umngani wami ungitshele ukuthi kunosomabhizinisi osemncane okwazile ukuphumelela, mhlawumbe nami makubekhona engikwenzayo okuzokwenza ngingakhaleli abazali.
“Ngivakashele lapho uMnu Shezi efundisa khona abantu ngebhizinisi, ngathola khona amaqhinga ngabe sengiqala ngowezi-2016 ukuhweba nami, atholakala amasenti.
“Kakugcinanga lapho ngoba bengilokhu ngimthumelela engikwenzayo waze wangiqasha ebhizinisini lakhe,” kusho uMnu Shandu.
Uveze ukuthi usebhalisele iziqu zeMasters kuwona umkhakha wezomthetho.
UMnu Shezi uthe intshisekelo kaMnu Shandu usheshe wayibona wabe esemsiza. Uthi kubalulekile ukusiza abanye abantu baphumelele.