IMITHWALO ISIBHEKE E-CURRIES FOUNTAIN KOMASIKANDI
KUZODEL’ uMakhasana ngoMgqibelo eCurries Fountain Sportsfield, eThekwini, kwiMTN Masikandi Festival njengoba usha phansi umbango wesamba semali ebangwayo kule festiveli ewumqhudelwano.
Abahleli bomcimbi bathi bahlele ukuba amaciko adlalele abalandeli izingoma zawo ezintsha - eziphume ngePhasika - okuyizona azoqhudelana ngazo ngokwamadownload.
Omunye wabahleli balo mcimbi, uNkz Tumi Khowa, uthi isasasa likhulu kakhulu njengoba abalandeli bethi kuyocaca ngoMgqibelo ukuthi yimuphi umculi okhiphe i-albhamu eshaya khona kuleli Phasika.
“Abalandeli mabaphume ngobuningi ngoba ezokuphepha ziqinile kuzobe kujatshulwe kakhulu,” kusho uNkz Khowa.
Esangweni kuzobe kungenwa ngokuba uthenge i- data ka-R30 yakwaMTN. Kubekwe umklomelo wemali engango-R50 000 nezinkomo eziwu-5, okuyizinto ezizohamba nomculi ozofika nabalandeli abaningi emcimbini.
Esangweni umuntu uzobe evota, esho ukuthi uzobuka muphi umculi. Emuva komcimbi kuzobalwa amavoti atholwe yilowo mculi esangweni. Umculi okwenziwe ama- download amaningi ezingoma zakhe, uzothola u-R50 000.
Kubaculi abazobe bekhona u-Ali Mgube ngomunye ozobe eqhulula izingoma ze-albhamu yakhe entsha eshisa izikhotha ethi “Ngiyadiseva”.
Kuzobe kuboshelwe uKhuzani, uDsD, uShwi noMtekhala, Amagcokama, Amageza Amahle, uBahubhe, uMnikezwa, uMthandeni, uMjikijelwa, iMfezemnya- ma, iThwasa Lekhansela, uQhosha, uJaivazimnike, uMalahle, uBuselaphi, uMdumazi, uMajotha nabanye abaningi.
Kubaculi abawu-10 abasavelela abebenikwe ithuba lokuba bakhankasele amavoti awu-2000 azobafaka emcimbini ngoMgqibelo - bese kukhethwa ababili kubona abazongena esigabeni sezinkunzi ukuze bakhokhelwe imali - uNjoko nguyena obesahamba phambili kanti uDumakahle noMagic Voice bekuseyizinkani zababili.
Mthobisisi@ilanganews.co.za