Kudlwengulwe umfanyana (7)
Umsolwa kuthiwa uyivalele ubusuku bonke ezitika ngayo, wayiklinya ezama nokuyibulala
USABABAZA umphakathi waseZwelisha, eNanda, ngesenzo sowesilisa osolwa ngokudlwengula ephindelela umfanyana (7) ubusuku bonke waze wamdedela ekuseni ngeledlule.
Kubikwa ukuthi umsolwa ukwenze lokhu maqede wesabisa ingane ngokuthi uzoyibulala uma ike yathi vu ngalolu daba. Ngokuthola kweLANGA, lo mfanyana udlwengulwa nje, ubedukile kubo. Ngesikhathi etholakala, kuthiwa ubenezimpawu ezikhombisa ukuthi ubeklinywa, okwenze zaqina izinsolo zokuthi umsolwa ubezama ukumbulala.
ILANGA likhulume nonina walo mfanyana - ongeke adalulwe ukumvikela - uthe ufikelwa yizinyembezi uma ebuka indodana yakhe selokhu kwenzeke lesi sigameko. Uthi ingane iphazamisekile kanti kunzima nokuba bakwamukele okwenzekile. Utshele ILANGA ukuthi umsolwa ngumuntu abamaziyo, kodwa bebengakaze bazitshele ukuthi angenza le nto.
“NgoLwesine ingane iphume yaya emnyango sibuka umabonakude, kasizange sinake yize bese kuhwalele ngoba ijwayele ukudlala eduze nomuzi. Kuthe kuqhubeka isikhathi ingabuyi, ngaphuma ngithi ngiyoyibiza. Ngiyibheke ngaze ngancama.
"Sicele namanye amalungu omphakathi ukuba asibhekise, sathola ukuthi ngesikhathi iphu- ma endlini, iye kwamakhelwane ongezansi kwethu, bayixosha bayiyalela ukuba igoduke ngoba bese kuhlwile. Nangelanga elilandelayo siqhubekile nokubheka ngoba ubuthongo bebungafiki sangayithola. Kuthe sekukhanya, yaqhamuka indodana yami ingcolile. Kuthe uma ngiyibuza yangabaza ukusho ukuthi iphumaphi.
"Igcine ishilo ukuthi ibithathwe ngu..(edalula umsolwa ngegama) waya nayo endlini yakhe. Ingitshele ukuthi ulale nayo amahlandla amathathu, kwathi eseqedile wayiklinya.
"Ubuye wayiyeka maqede wayisabisa ngokuthi uma ike yasho ukuthi kwenzekeni, uzoyibulala,” kusho unina wengane. Uthi babe sebebikela amanye amalungu omphakathi asekomitini amphelezela baya kudokotela okuqinisekisile ukuthi indodana yakhe idlwenguliwe. Bahambe bayovula icala emaphoyiseni. Ikhansela lakule ndawo, uMnu Siyabonga Thango, lithe liwutholile umbiko ngalesi sigameko, lathembisa ukuthi bazoweseka umndeni ukuze uthole usizo.
Okhulumela amaphoyisa KwaZulu-Natal, uCol Thembeka Mbhele, uthe amaphoyisa aseNanda aphenya icala lokudlwengula kanti bekungakaboshwa muntu.