Usizi befundela emnyango
Abanabo ngisho omahamba-nendlwana
BAFUNDELA emnyango abafundi baseMalahleni Primary School, eMnambithi, emuva kokuba lesi sikole sikhahlanyezwe yizivunguvungu ezihambisana nemvula nokuduma kwezulu okushiye umonakalo omkhulu kule ndawo.
Kubikwa ukuthi lesi siphepho senzeke mhla ka-25 Januwari, sakhahlameza wonke amagumbi okufundela. ILANGA libikile ngalolu daba phambilini kanti ngaleso sikhathi abafundi bebeduve emakhaya ngenxa yale nkinga.
Leli phephandaba lithole ukuthi abazali bakhathazekile ngesimo salesi sikole kwazise akukho ngisho namagumbi okufundela angomahambanendlwana. Omunye wabazali ongathandanga ukudalulwa igama lakhe, utshele leli phephandaba ukuthi bakhathazekile ngokungalungiswa kwesikole ngoba abafundi bafunda kabuhlungu.
Uthe uMnyango wezeMfundo KwaZulu-Natal, uthembise ukuthi uzongenelela kodwa kuze kube yimanje lutho.
“Sekuphele izinyanga ezintathu kube nesiphepho, kodwa umnyango kakukho okwenzayo ngalokhu. Ubusika sebusondele, izingane zethu zizoqhuqhwa ngamakhaza emnyango.
“Sidinga ukwazi ukuthi umnyango wenzani ngalolu daba ngoba okwamanje kutshengisa ukuthi kawenzi lutho. Uma izulu lina abafundi kabayi esikoleni, bayajikiswa kuthiwa maphindele emakhaya.
“Sinxenxa umnyango ukuba ungenelele ekuxazululeni le nkinga,” kusho lo mzali. Usihlalo wesigungu esilawula isikole, uMnu Thulani Kheswa, uthe kuyiqiniso ukuthi izingane zifundela emnyango.
Utshele ILANGA ukuthi umnyango wezemfundo ubikeliwe ngodaba lwalesi sikole. Uthi kunabantu abayile ukuyobheka umonakalo wesikole emuva kokukhahlamezeka kwaso, bathe kuzodingeka u-R 2.2 million ukuze silungiswe.
“Akekho umfundi okumele afunde esikoleni esifana nalesi. Umnyango kumele ulethe amagumbi angoma- hamba-nendlwana ukuze abafundi bengeke bafundele emnyango.
“Uma umnyango wehluleka wukuletha lawo magumbi, isikole kumele sivalwe ngoba akekho umzali ofuna ingane yakhe ifunde ngaphansi kwalesi simo.
“Kuyimanje abazali bafuna ukukhipha izingane zabo baziyise kwezinye izikole ngenxa yale nkinga,” kusho uMnu Kheswa.
Okhulumela uNgqongqoshe wezeMfundo KwaZulu-Natal, uMnu Kwazi Mthethwa, uthe umnyango ubeka phambili izikole ezidinga usizo ngokushesha njengalesi.
“Umnyango unxusa uthishanhloko walesi sikole namalungu esigungu esilawula isikole ukuba baxhumane nesifunda sezemfundo sakule ndawo ukuze lolu daba lizosukunyelwa ngokushesha,” kusho uMnu Mthethwa.
Sekuphele izinyanga ezintathu kube nesiphepho, kodwa umnyango kakukho okwenzayo ngalokhu. Ubusika sebusondele, izingane zethu zizoqhuqhwa ngamakhaza emnyango...