Ushe wangqongqa umtholampilo
Lziguli zisale dengwane
ZISALE dengwane iziguli, ezinye zaphindiselwa emuva zingasiziwe ngoLwesibili kusha umtholampilo eMooi River.
I-Bruntville Community Health Centre ishe ekuseni ngesikhathi kushintshana izisebenzi ebezingena ebusuku nebezizongena ekuseni.
Ngokuthola kweLANGA ngomthombo ongaphakathi, umlilo okusolwa ukuthi uqutshulwe yizintambo zikagesi ushise igumbi lemithi nalapho kwamukelwa khona iziguli.
“Imithi eminingi ishe yangqongqa namakhadi eziguli abegcinwe lapho zemukelwa khona. Kushe nemishini yokusebenza okubalwa neyokuhlola iBP. Iziguli ezimbalwa ebezilele embhedeni, ziqhutshwe ngezinqola zakhishelwa emnyango intuthu ingakavimbanisi kakhulu,” kusho lo mthombo. Esinye isiguli esikhulume ne
uNkz Nombuso Myeza, sithi sifike ngoLwesibili emini abahlengikazi behleli emnyango kubonakala ukuthi kukhona okungahambi kahle njengoba amanzi abengamathantala egcekeni, amafasitela wonke ebhodlokile.
“Sithe sifika bathi abahlengikazi masijike ngoba umtholampilo nemithi kushile, ngeke sithole lutho. Siphume silambatha singasiziwe kanti eminye imitholampilo ikude kakhulu nathi. Kasazi ukuthi izinto zizoze zibuyele nini esimeni kulo mtholampilo,” kusho yena.
Omunye umthombo, ongaphakathi kulo mtholampilo, uthi lize lashona elangoLwesibili belinde umqondisi wesifunda okhishwe wuMnyango wezeMpilo KwaZuluNatal, obezokhipha umhlahlandlela wokuthi lo mtholampilo uzovalwa yini okwesikhashana noma uzoqhubeka usebenze.
Bekulindwe nabacwaningi abazobheka ukuthi yini equbule lo mlilo njengoba namanje kungakaziwa, kusasolwa izintambo zikagesi.
Umthombo uthi izolo ngoLwesithathu kufike amaloli amabili akwaNational Health Insurance (NHI) iziguli ezisizelwa kuwona njengamanje.
Okhulumela uMnyango wezeMpilo, uNkz Ncumisa Mafunda uthi bezwile ngokusha komtholampilo.
“Siyadabuka kakhulu ngokusha kwalo mtholampilo njengoba uku- hlinzeka umphakathi ngezinsiza zezempilo kuye kwathikamezeka kancane. Kumanje sisezinhlelweni zokuthumela umtholampilo wesikhashana ( mobile clinic) ukuze umphakathi uqhubeke nokuthola usizo lwezempilo ngesikhathi sisazama ukubuyisela izinto esimeni esijwayelekile,” kusho uNkz Mafunda.