Makubekwe phambili izidingo zomphakathi
KUCACELA ngisho ingane ukuthi uhulumeni oholwa nguNdunankulu waseNorth-West, uMnu Supra Mahumapelo, wehlulekile ukuphatha ngendlela lesiya sifundazwe, osekwenze ingxenye yabantu bakhona yabhikishela ukuba akhishwe esikhundleni.
Siloba lapha nje, izibhedlela eziningi eNorth-West zivaliwe ngenxa yokwesweleka kwemithi yeziguli, kanti kwezinye izikole kukhala ibhungezi, izingane kazifundi.
UMnu Mahumapelo, obengakufihli ukuthi weseka uMnu Jacob Zuma obengumengameli waseNingizimu Afrika, futhi wabuye wakhankasela uNkk Nkosazana Dlamini-Zuma ukuba akhethelwe kwesokuba ngumengameli we-ANC emhlanganweni waleli qembu ngoZibandlela (December) nyakenye, unukwa ngokwengamela uhulumeni ogutshuzelwe yinkohlakalo eyesabekayo ethinta umndeni wezimanga wakwaGupta.
Noma esolwa ngokwehlulwa wumsebenzi nokuthinteka ezenzweni zenkohlakalo, futhi abanye eqenjini lakhe i-ANC, bathi kufanele akhonjwe indlela, yena uthi akenze lutho, futhi akayi ndawo. Sekwehlule ngisho ithimba lesigungu esiphezulu seANC - ebeliholwa ngumengameli Cyril Ramaphosa - seliziyele mathupha kulesiya sifundazwe, lazibonela okwenzekayo futhi laba nezingxoxo noMnu Mahumapelo, kodwa le ndoda ithi kayizimisele ukubeka phansi izintambo.
Yebo, kungenzeka ukuthi uMnu Mahumapelo umsulwa ezenzweni zobui yena nohulumeni wakhe abasolwa ngazo. Noma ngabe kunjalo, iqiniso lithi isimo sibi, ngakho kufanele ngabe ucabangela abantu besifundazwe sakhe khona isimo sizobuyela kwesejwayelekile. Umholi obakhathalele abantu ubeka bona phambili, abeke eceleni izidingo zakhe nomndeni wakhe. Okuxakayo ngokunqoha kukaMnu Mahumapelo ukushenxa esikhundleni, wukwehluleka kwe-ANC ukuthatha isinqumo ngekusasa lakhe ngokushesha.
Kuzokhumbuleka ukuthi uMnu Ramaphosa ubuye isigubhukane eLondon, ngaphambi kokuphela komhlangano wamazwe ayengamakoloni eBritain ngeledlule ngoba kuthiwa uzolungisa isimo eNorthWest. Izingqapheli nabantu nje bakulesiya sifundazwe, bebecabanga ukuthi yena nethimba lakhe bazophoqa ukuba uMnu Mahumapelo ashiye, futhi lokho kuzokwenzeka ngokushesha.
Kakwenzekanga lutho olutheni, kunalokho uMnu Ramaphosa umemezele ukuthi isigungu esilawula i-ANC, i-National Executive Committee, sizodingida udaba bese sithatha isinqumo ngekusasa likaMnu Mahumapelo.
Lesi sigungu sizohlangana ngenyanga ezayo, okuchaza ukuthi okuningi kumile ukusebenza kulesiya sifundazwe ngoba kulindwe i-ANC ukuba ithathe isinqumo ngondunankulu waso.
Le ndlela yokwenza izinto kayiphusile. Yini kanti umsebenzi kaMengameli we-ANC uma engakwazi ukuthatha izinqumo uma kunezimo eziphuthumayo, ezidinga ukulungiswa ngokushesha?