Sikhulu isidingo sokufundisa ngezemidlalo
KUHLONGOZWA umkhankaso wokuba kuchazelwe umphakathi ngesimo sezemidlalo nendlela efanele yokuziphatha okumele iqondwe yibo bonke abalandeli bezemidlalo. Lokhu kushiwo izolo yiMeya yeTheku, uNkk Zandile Gumede, esigcawini sabezindaba eMoses Mabhida Stadium ngenxa yesiphithiphithi esenzeke ekupheleni komdlalo we-semi final yeNedbank Cup ebingoMgqibelo phakathi kweKaizer Chiefs neFree State Satrs.
IChiefs iguqiswe ngo-2-0 okwenze abalandeli bayo bavuka inj' ebomvu bagulukudela enkundleni, bashaya onogada.
Ngokombiko wabaphathi benkundla - abaholwa nguMnu Vusi Mazibuko - kuningi okuyimpahla ecekeleke phansi, phakathi kwakho okubalwa uthango oluvimbela izibukeli, imigqomo yezibi, izindawo zokuthola amanzi, amapuleti okudlela, yizingilazi zokuphuza, yizihlalo namatafula. Umonakalo odalekile ulinganiselwa ku-R2,6 million.
“Abathandi bezemidlalo kulindeleke ukuba basiqonde isimo somdlalo ngokwemvelo yawo ukuthi uyanqoba noma wehlulwe. Nxa wehlulwa akukho muntu okumele esatshiswe futhi akukho mpahla okumele icekelwe phansi.
“Izigameko eziyishwa ezenzeke ngempelasonto zidala isithombe esibi kithina njengesizwe futhi sethemba ukuthi amaphoyisa azozithola izaphulamthetho," kusho uNkk Gumede.
Emuva kokuba esigxekile lesi sigameko uNkk Gumede, ukhiphe imininingwane ngesibalo sabalimele, okungabayi-12 abalashelwe enkundleni nabayisi-6 abayiswe esibhedlela, noyedwa othole usizo lokuqala khona enkundleni.
Okunye-ke kube wukucekeleka phansi kwenkundla, phakathi kokunye okubalwa izihlalo ezevile ku-500 ezephukile nothango olwehlukanisa izibukeli nenkundla.
UMnu Mazibuko nguyena onikeze incazelo kuleyo mibuzo ethinta kakhulu isimo sezokuphepha enkundleni. Nakuba ethe akathandi ukugxila esigamekweni sangoMgqibelo kwazise udaba lusaphenywa, kodwa uchazile ngothango okufohlwe kulo ngenkathi kusuka izibhelu. IMBANGELA
Nakuba bekuzwakala imibiko ngezinsongo zabalandeli beKaizer Chiefs abebezibhekise kubaphathi baleli qembu ngodaba lokuba kususwe umqeqeshi uMnu Steve Komphela esikhundleni, kodwa akekho obelindele ukuthi izinto zingaholela ekubeni kusuke iziphithiphithi ezingadala umonakalo ongaka.
UNkk Gumede uthe nakuba ku- ngesona isifiso sabo ukuncisha izibukeli ilungelo lokuzithokozisa kodwa isazobhekisiswa indaba yokuthengiselwa izibukeli amanzi amponjwana uma ziye emidlalweni.
Nakuba incazelo eyethulwe kubacosheli bezindaba ingenabanga ngezokuphepha njengoba udaba lusesezithebeni kodwa okuvele lapha wukuthi ezokuphepha emdlalweni zisesandleni sombutho wamaphoyisa njengoba kubaluliwe emthethweni owaziwa ngeSafety At Sport And Recreational Events Act (SASREA).
OKWENZEKAYO NJENGAMANJE
Selidume ladlula elithi nakule sizini iChiefs ayizunqoba lutho kuyo yonke imincintiswano ekhona njengoba sekusele kancane ukuba igoqwe enyangeni ezothwasa uMeyi 2018.
Sekungumlando futhi ukuthi sekwenzekile lokho abebekhala ngakho abalandeli beKaizer Chiefs, ukuba uSteve Komphela ongumqeqeshi walo ashenxe esikhundleni.
Indaba ebhekiwe manje yileyo yokumele kwenziwe ngesiphithiphithi esenzekile, esithele ngehlazo iPremier Soccer League (PSL).
Nokho-ke iPSL kayipholisanga maseko njengoba isiyethwese iChiefs icala ngalesi sigameko.
Nakuba kungakaziwa ukuthi sizoba yini isiphetho, lesi sigameko sesiqubule imibuzo emphakathini ukuthi kusuka manje kuya phambili yini ezokwenziwa yiziphathimandla zalo mdlalo olandelwa yizigidi ukuze zinqandeke izigameko ezifuze lesi ngomuso.
MDALA LO MKHUBA
Yize lesi sigigaba sithathwa njengesikhulu selokhu kusungulwe iPSL, kodwa indaba yodungunyane enkundleni kanobhutshuzwayo yindala.
Kuzokhumbuleka ukuthi ngo1971 kwenzeke esifanayo e-Orlando Stadium kubambene i-Orlando Pirates neChiefs koweKeg League. IBucs yaguqa ngo-2-1 okwenza abalandeli (bePirates) bavuka inj' ebomvu bagcwala inkundla ngoba besola uMnu Ewert Nene (ongasekho) owayeyimenenja yeChiefs ngokusebenzisa umuthi.
Abalandeli beChiefs benza lokhu nje, leli qembu belisanda kuhlawuliswa u-R250 000 ngakho njalo belu ukuziphatha budlabha kwabalandeli balo, okwenzeke eFNB Stadium emuva kwesibhaxu sika-3-0 elisithole kwiChippa United. Kulo R250 000 kulengiswe u-R200 000 ukuba leli qembu lingathinteki esigamekweni esifuze lesi kuze kuphele izinyanga eziwu-24.