Mina ngiyameshwama umengameli olawula ezocansi
BENGITHI ngisazothatha i-shotleft ngiyobona umnyombo womfulakazi iNile le e-Uganda kodwa uma ngizwa ukuthi umengameli wakuleliya lizwe, uYoweri Museveni, umemezele ukuthi usezoshaya umthetho onqabela abantu ukuba bajabulisane ngokocansi besebenzisa imilomo nolimi, ngashintsha umqondo.
Lo mlisa ushaqe umhlaba wonkana uma ethi ukukitazana ngolimi nokukhothana ezithweni zomzimba ezibucayi uzokwenza kube yicala elibomvu, kanti labo abayotholakala bekwenza lokhu uyobabhadlisa ejele.
Uthe umlomo ngowokudla ukudla, kawakhelwanga ukukhotha nokumunca izitho zomzimba ezingezansi nokhalo.
Phela waqala ngokwenza ubutabane bube yicala ezweni lakhe ngonyaka ka-2014, washo nokuthi abesilisa abayotholakala bejabulisana bodwa ngokocansi, kanjalo nabesifazane, bayogwetshwa iminyaka ewu-14 ejele. Kusho ukuthi kuzoba namaphoyisa nje esinene, aqaphe abantu abahamba benga- wuvalanga uziphu futhi abheke nokuthi uma abantu beqabulana, bangehleli ngezansi kokhalo.
Ngitshele owakwami ukuthi cha sekuyomele sikhethe ukuyongcebeleka kwelinye ilizwe ukuze phela singathi siyakitazana ehhotela kanti uMuseveni usibheke ngembobo kakhiye.
Athi uma eqeda asibophe, asivalele ejele. Yekanini amahloni sesishayela ucingo uNgqongqoshe weZangaphandle, uLindiwe Sisulu sichaza ukuthi siboshelweni.
Uma-ke bengasivumeli ukuba sishaye ucingo, yeka leyo ncwadi okuzomele ngiyibhalele uSisulu. Ngiyiqale nje ngithi: “Diyela Ngqongqoshe uLindiwe Sisulu. Mina nowakwami sivalelwe ejele lapha e-Uganda, sibekwe icala lokukitazana ngokocansi sisebenzisa imilomo.
“Besivakashele leli lizwe siyozingcebelekela nje kodwa kuthe ngobusuku bokuqala sibuya ukuyobona umfulakazi iNile, sabuyela ehhotela lethu sesiyophumula.
“Sithe sisajabulisana njengenjwayelo, kwazise leyo yinto esidume ngayo njengoba sesineminyaka ewu-16 sishadile, umengameli Museveni wangena nezicabha engasadle nkobe zamuntu, elandelwa yithimba lamaphoyisa ezocansi, sase siyabanjwa njalo.
“Usitshele ukuthi ngeke siphuze iwayini ngemilomo yethu siphinde sijabulisane ngayo futhi. Uqhubeke wathi lokho kuyicala elibomvu ezweni lakhe ngoba kuwumkhuba owafika nondlebe zikhany’ ilanga.
“Kasisakwazanga-ke nokuyobona ezinye izindawo ebesihlele ukuyozibona, njengeNgamba Island eLake Victoria neSempaya Hot Springs njengoba sesivelelwe yilo mshophi. Besicela umnyango wakho usisize usitakule kulolu talatiya. Yimina ozithobayo...”
Uma kukhona oqashelwe ukufunda izincwadi zikangqongqoshe, angathi eqeda nje ukuyifunda le ncwadi bese ebiza ozakwabo, ehleka kuphuma nezinyembezi.
“Hheyi Mgabadeli, awuze lapha nayi insumansumane yendaba! Phela kunabantu ababoshelwe ukushayana ngeroma le kwelaseUganda. Woza uzozifundela nawe.”
Naye uMgabadeli abize abanye kanjalo kanjalo, kanti ungqongqoshe yena useyoyithola isikhishwe nakuFacebook, yasakazwa nakoWhatsApp.
Siyothi sikhishwa ejele sesibuyela kuleli, sifike esikhumulweni sezindiza i-OR Tambo sekuhlangene iqulu labantu lishaya itoyitoyi, liphethe izingqwembe ezibhalwe ukuthi “ikhotha eyikhothayo!” kanti ezinye zibhalwe ukuthi “ucansi neroma ngamathe nolimi”.
Laba abathanda amabheshi bayobe bedlala le ngoma yeDistruction Boyz ethi “Omunye Phezu Komunye”, beqashe noZodwa Wabantu ukuthi azodansa ajabulise izihlwele.
Phela eMzansi kasiphuthwa ngamathuba okuzijabulisa, sishaya amabheshi noma kushoniwe. Osomashishini abayizwa inuka le kude imali, bayophuthuma basungule izinkampani ezizoheha izivakashi zase-Uganda ezifisa ukuzozijabulisa ngokocansi lapha eMzansi zingabonwa nguMuseveni.
Nami ngicabanga ukusungula eyami inkampani engizoyibiza ngeShona Phansi Sex Tours, engethe-mba ukuthi iyoba nesasasa elikhulu kuleliya lizwe. Phela sizobayisa ePhoyinti lapho bezokhothwa kho-na badele, babe sebebuyela emuva bemoyizela.
Nosomabhizinisi abanamahhotela namaB&B bazoyibulala imali. Ngeke isize osomabhizinisi kuphela ngoba nalaba abaqwayizayo bazobe bematasatasa.
Phela kunabantu ababoshelwe ukushayana ngeroma...