KUBHEKWE AMAREKHODI AMASHA KUBAGIJIMI BAKULELI KWEYE-CCA
KONKE sekumi ngomumo ngemidlalo yeCAA Southern Region Youth and Junior Championships eqala kusasa ngoLwesihlanu isongwe ngoMgqibelo eBoksburg Stadium, eGauteng.
Kule midlalo kulindeleke izinga eliphezulu kubasubathi baseNingizimu Afrika kulandela ukwenza kahle kwabo kwi-International Association of Athletics Federation (IAAF) nyakenye eKenya.
Emidlalweni yaseKenya abasubathi bakuleli baphula amarekhodi amaningi, baphinde benza kahle nakweyeSouth African National Track & Field muva nje ePaarl, eWestern Cape lapho uGontse Morake noKayle Blilgnaut bephule khona amarekhodi kwi-400mH nakwiShot Put ngokwehlukana.
Kule midlalo kulindeleke amazwe ali-11 ukubamba iqhaza okuhlanganisa iMauritius, iLesotho, iZambia, iNamibia, iSwaziland, iMozambique, iSeychelles, i-Angola, iBotswana, iZimbabwe neSouth Afrika.
Abasubathi abazokwenza kahle kule midlalo bazothola ithuba lokumela amazwe abo kwi-IAAF World Junior Championships ngoNtulikazi (July) eTampere, eFinland.
Le midlalo izobuye isetshenziselwe ukuqoka abasubathi abazokuya kwi-3rd CAA Youth Championships ngoNtulikazi e-Algeria, kuphinde kuqokwe neseYouth Olympic Games ezokuba ngoMfumfu (October) e-Aires, e-Argentina nese-Union Sports Council Region 5 U/20 neYouth ezokuba ngoZibandlela (December) eGaborone, eBotswana.
Abanye abasubathi okubhekwe ukuba baphakamise ifulegi lakuleli kule midlalo nguThando Dlodlo, uRetsidiswe Mlenga abenza i-100m, uSokwakhana Zazini owenza i-400m ne-400mH, uGontse ukukha nje phezulu. Kule midlalo babili kuphela abazokube bemele iKwaZulu-Natal kubasubathi abali-133 abakhishwe yi-Athletic South Africa (ASA).
Le midlalo eseBoksburg inikwe elakuleli emuva kokubheduka kwesifo esiyingozi eZambia lapho obekumele idlalelwe khona.
Kusenjalo, abasubathi abazokuba yingxenye yeComrades Marathon bahlelelwe iTraining Run ezokuba ngeSonto ihamba emzileni wawo lo mjaho.
Kuzokube kune-60km ezoqala eCamperdown, i-50km ezoqala eNchanga ne-40km ezoqala ePhezulu Lodge ngaseBotha’s Hill. Yonke le mijaho izosongwa eStella, eThekwini. Abazobamba iqhaza bayacelwa ukuba baphathe umnikelo ka-R100 wokuthenga iziphuzo.
Ngeminye imininingwane kungashayelwa uMakhosi Mhlongo kwethi: 073 065 7753, uManzini: 083 342 2857 noma uWelcome: 082 718 1788.