IMIDLALO YOMKHUMULAJEZI EMAKILABHINI E-SAB ETHEKWINI
AHLELELWE imidlalo yomkhumulajezi amakilabhu agijima kwiSAB League ngaphansi kweSouth African Football Association (Safa) eThekwini Region.
Lo mqhudelwano obizwa ngeeThekwini Football Tournament, uqala kusasa ngoLwesihlanu usongwe ngeSonto eCato Manor Sports Ground. Le midlalo ihlelwa yiSafa eThekwini noMkhandlu weTheku.
Abazokudla ubhedu bazohlomula ngo-R10 000, inkomishi nezindondo zegolide kuthi abahlulwe kowamanqamu bathole u-R5 000 nezindondo zesiliva.
Abazohlulwa emidlalweni eyandulela owamanqamu, bazonikwa u-R2500 ikilabhu ngayinye.
U-Eric Smith oyisekela likaAlpha Mchunu ongumengameli weSafa eThekwini, uthe le midlalo imqoka kakhulu ngoba izophinde isetshenziselwe ukuhlola abadlali abazohlungelwa ukumela iTheku kweyokuhlungela isikwati saKwaZulu-Natal.
Isikwati sesifundazwe sizokuya emidlalweni kazwelonke yeSAB League okungakashiwo ukuthi izodlalelwa kuphi.
Imidlalo yeSAB League, inezinhlaka ezimbili eThekwini njengoba kukhola le yeSafa eThekwini Region nedlaliswa nguKwenzakwakhe Ngwenya ojutshwe yiSafa kuzwelonke ukuzoyisingatha ngenxa yezinxushunxushu kulesi sifunda.
Nokho-ke kuthiwa sekuntwela ezansi ngokuxazululwa kwezinkinga kulesi sifunda njengoba iSafa eThekwini ixoxisana nobuholi bukazwelonke.
Kuthiwa sekusele kancane ukuba ziphothulwe izingxoxo zokubuyisana.
Lesi sifunda sekunesikhathi sinobuholi obubili obuzinze eHoy Park ngaphansi kukaMchunu nobaseCurries Fountain obuholwa nguMazwi Mkhize.