Bafana nekati elibekelwe inyama nobisi
Ithe chithi saka eyokulungiselela iComrades Marathon
ABAGIJIMI baKwaZuluNatal bafana nekati elibekelwe ubisi nenyama njengoba ithe chithi saka imijaho yokuzibekisela indawo kwiComrades Marathon yanonyaka ezokuba mhla zili-10 kuNhlangulana (June) isukela eMgungundlovu isongwe eMoses Mabhida Stadium, eThekwini.
Umjaho obhekwe ngabomvu yiJG Zuma Marathon ngeSonto, eGreytown.
Lo mjaho ngowokuhlonipha obengumengameli wakuleli, uJacob Zuma.
Uzosukela eSeven Oaks ngase- Greytown usongwe e-Albert Falls budebuduze naseMgungundlovu.
Lo mjaho uqale ngelikhulu isasasa eminyakeni embalwa edlule kanti manje sewubonakala ushona phansi.
Phambilini ubusakazwa bukhoma kwiSABC 2 nokho nonyaka kuthiwa ngeke ukhonjiswe.
Lokhu kuqinisekiswe ngomunye wabadidiyeli bawo, uShadrack Dladla, otshele ILANGA ukuthi umjaho wanonyaka uzokube ungekho kumabonakude. Nokho ukuqinisekisile ukuthi uZuma uzokube ekhona ukuzokwamukela izingqwele.
Yize sekuvaliwe ukubhalisela lo mjaho kodwa uDladla uthe kuzo- phinda kuvulwe kusasa ngoLwesihlanu lapho okuzokube kulandwa khona izinombolo zokugijima eKings Park Athletics Stadium, eThekwini, bese kuphinda kuvulwe futhi ngoMgqibelo e-Albert Falls.
Kulo mjaho ohambisana ne21km ezoqala eNew Hannover ne10km eqala eduze kwase-Albert Falls, izingqwele kwiMarathon zizohlomula u-R50 000 kwehle njalo kuze kufike kwabazongena endaweni ye-10 abazothola uR1000 ngokwahlukana kobulili.
Abafuna ulwazi ngalo mjaho bangaxhumana noDladla kwethi: 073 142 3533/ 076 765 5625 noma uCeli Makhoba kwethi: 073 175 8725.
Abagijimi basoPhongolo bazogadulisana kwiPongola Sugar Cane 42km, 21km ne-10km ezokuba ngoMgqibelo kusuka ngo-05h30 ezinkundleni zemidlalo oPhongolo. Ngolwazi kushayelwa uHeinrich Koen kwethi: 083 228 7682.
UMhlathuze Athletic Club uhlele iTronox Marathon, ehambisana ne-21km ne-10km ngeSonto kusuka ngo-05h30 e-Addison Park eMpangeni. Ngolwazi kuthintwa uRoy Singh kwethi: 082 947 2153.
U-Anand Naicker uhlele iGaterite Challenge (42km, 21km ne-10km) ezokuba ngoLwesibili lweholidi kusuka ngo-05h30 eVerulam Recreation Grounds. Ngolwazi kukhulunywa no-Anand kwethi: 083 783 6363.
AbasePort Shepstone bazokhiphana inkani kwiHibiscuss Coast Marathon (48km) ezokuba ngoLwesibili isukela Ogwini Sports and Leisure. Ngemininingwane kushayelwa uKim Jones kwethi: 084 511 7651.
USabelo Zondi uhlelele abasubathi baseMsinga i-10km ezokuba kusasa ngoLwesihlanu ezoqala eCwaka isongwe ePomorey.
Kuzovalwa ngoLwesithathu lomhla zimbili kuNhlaba (May) ukwamukelwa kwemininingwane yabagijimi abazobamba iqhaza kwiComrades Marathon yanonyaka.