Akanagqubu nebhokisa
UMantengu uthembisa ingcwenga yesibhakela eMtuba
UTHEMBISA isibhakela esinenkosi phakathi u-Innocent “Tycoon” Mantengu ozovikela ibhande le-International Boxing Federation (IBF) All Africa Junior Featherweight kuDoctor Nsele ngoMgqibelo emini KwaMsane Hall, eMtubatuba.
Kuzoqala izimpi zama-amesha ngo-9 ekuseni ziphele ngo-12h00 emini. Ezesigaba esikhokhelayo zizoqala ngo-13h00 kuze kube ntambama.
UThulani “Nkunzi” Magudulela weLudonga Boxing Promotions ehlela lezi zimpi, uthe seziphothuliwe izinhlelo. Uthi kumjabulisa kakhulu ukuphumelela kwezinhlelo zokuthi uMantengu alwele ngakubo.
“Into ebingiphathisa ngekhanda wukungahanjiswa ngesikhathi kwemali yeBoxing South Africa. Nokho-ke ngijabule ngoba izinhlaka ezithintekayo zikwazile ukululungisa lolu daba.
"Konke kuhamba kahle, kanti ngimufisela inhlanhla uMantengu. Phela yimina engilwe kanzima ukuze athole leli bhande.
"Ukumhlelela le mpi kuyizinkomba zokuthi anginagqubu naye ngokuthi usefudukele eGoli. Ngicabanga ukuthi uzofika eyilungele impi,” kusho uMagudulela.
UMantengu utshele leli phephandaba ukuthi uzotheleka kusasa ngoLwesihlanu eMtubatuba ukuzokalwa isisindo.
Uthe uzilolonga kabili ngosuku eSiyanqoba Boxing Gym kaSam Ndlovu ongumqeqeshi wakhe. Leli bhokisa lisanda kushiya i-eThekwini Boxing Gym eholwa nguMagudulela ngenhloso yokufuna amadlelo aluhlaza eGoli.
“Bengingcweka noFlo Simba ukulungiselela le mpi. USimba ungelinye lamabhokisa asezingeni eliphezulu.
"Amalungiselelo empi ahamba kahle kakhulu, futhi angimboni uNsele engiphuca leli bhande. Okuhle wukuthi ngizokube ngilwela phambi kwabantu bangasekhaya.
“Le mpi izocacisa okuningi ngempilo yami entsha njengoba sengizinze eGoli. Ngifuna ukukhula kakhulu kulo mdlalo ngoba neminyaka yobudala kayimile, iyakhula.
"Kumqoka ukusebenza kanzima manje umzimba usavuma ngoba akuhlalwa isikhathi eside kulo mdlalo,” kusho uMantengu.
Lezi zimpi zesekwa nguMnyango WezeMidlalo waKwaZulu-Natal oholwa nguBongi Sithole-Moloi nomasipala waseMtubatuba oholwa nguVM Gumede oyiMeya.