ABASENANDABA NAMABHONASI ABASEZEMBENI KWI-NFD
ABASENANDABA namabhonasi, sebelwela ukuvikela imisebenzi yabo abadlali beRichards Bay FC esengcupheni yokugencwa yizembe kwiNational First Division (NFD).
IBay izobhekana noBuntu Cape Town koweNFD ngeSonto ngo15h00 eMhlathuze Sports Complex, eRichards Bay. Lo mdlalo uthathwa njengowamanqamu kula makilabhu njengoba ikhanya kuwona indlela ebheke kwiMotsepe League.
Nokho iBay yiyona eyizimfivilithi ukunqoba lo mdlalo kwazise idlalela ekhaya, kulindeleke kuphume nesinedolo ukuzoyeseka. Ngaphandle kwalokho ibuye nephuzu ekuhambeni ibambana nale kilabhu ngo-1-1 emzuliswaneni wokuqala obuseCape Town.
UThabiso Nkoana ongumgadli weBay, uthi lo mdlalo yiwona ozobacacisela ngekusasa labo lokudlala kulesi sigaba.
“Lo mdlalo ufana nowamanqamu kithina. Uma sike sehlulwa kuzokube sekucaca ukuthi siyodlala kwiMotsepe League ngesizini ezayo.
"Empeleni unguwafa-wafa ngoba nabo balwela impilo yabo. Asisenandaba namabhonasi, into esifuna ukuyilwela njengamanje yimisebenzi yethu. Sizoyilwela le kilabhu,” kusho uNkoana.
Uthi kudlala amadolo uma becabanga ngesimo abakusona.
“Nakuba ngibazi ubuhlungu bokugencwa yizembe njengoba kwenzekile ngidlala kwiTuks, kodwa lokhu okwenzeka manje akufani, kwehlukile.
"ITuks igencwe yizembe ngingadlali vele, kanti lapha ngiyadlala okusho ukuthi kokuzokwenzeka ngizokube nginesandla. Abadlali bonke banovalo kodwa kufanele sizame ukwehlisa imimoya ukuze singenzi amaphutha kulo mdlalo.
Iphuzu ngeke lisisize siwadinga ephelele,” kusho uNkoana.
UFranklin Cale odlala esiswini kuBuntu, uthi iBay ayikulungisele- le ukuthi izoya kwiMotsepe ngoba bona kabayi lapho.
“Ngikholwa wukuthi umbango wezembe usuphakathi kwethu nabo, abanye mancane kakhulu amathuba okuthi lingabagenca. Ngifuna ukukusho kugcwale umlomo ukuthi iBay ngeke isehlule. Irekhodi lethu lihle kakhulu uma sihambile bangakukhohlwa lokho.
Kuyaphela ngabo ngale mpelasonto,” kusho uCale.
IBay iya kulo mdlalo nje, isendaweni yesibili uma usuka emsileni, ngamaphuzu angama-28 emidlalweni efanayo, bese uBuntu buba sendaweni yesithathu uma usuka emsileni ngamaphuzu angama-29 emidlalweni engama-28. Emuva kwalo mdlalo iBay izovala ngeMbombela United ekuhambeni, bese uBuntu busonga ngeTshakhuma Tsha Madzivhandila (TTM) ekhaya.
Leli phephandaba lithole ukuthi uBuntu buzele iphuzu nje kuphela kulo mdlalo weBay ngoba lushaya ngonyawo phansi ukuthi noma kanjani luzoyiguqisa iTTM eCape Town.
Isiyonke imidlalo yeNFD ezokuba ngeSonto iqhathwe kanje:
EThohoyandou: Tshakhuma Tsha Madzivhandila vs Uthongathi FC 15h00.
E-ABSA Tuks Stadium: Pretoria University vs Stellenbosch 15h00.
EMakhulong Stadium: Highlands Park vs Black Leopards 15h00.
EParow Park: Cape Town All Stars vs Royal Eagles 15h00.
EMhlathuze Sports Complex: Richards Bay vs Ubuntu Cape Town 15h00.
EVosloorus Stadium: Jomo Cosmos vs Super Eagles 15h00.
EPuma Stadium: Witbank Spurs vs Mbombela United 15h00.
EMthatha Stadium: Mthatha Bucks vs Real Kings 15h00.