AwePSL embangweni wokudlala kwiCaf
IChiefs isizama ukuzikhotha amanxeba
ABADLALI beKaizer Chiefs bafuna ukuzikhotha amanxeba okuba nesizini embi ngokulwela ukuyodlala e-Afrika ngesizini ezayo.
Nakuba iChiefs ibhinjelwa yizinto muva nje, kodwa isenethemba lokuqeda isendaweni yesithathu kwi- log ye-Absa Premiership ukumela elakuleli kwiCaf Confederation Cup ngesizini ezayo. Ibanga le ndawo neMaritzburg United abalandelanayo nayo kwi- log.
La makilabhu azoshukana koweligi ngoMgqibelo ngo-15h00 eFNB Stadium, eSoweto. Lo mdlalo uthathwa njengowombango wozolala endaweni yesithathu okuhlezi kuyona iMaritzburg kuthi iChiefs ibambe eyesine.
UBernard Parker ongomunye wabadlali abawumgogodla kwiChiefs, uthi bazimisele ngokulwela ukuyodlala e-Afrika.
“Ukudlala kwiCaf yiyona into esisele ngale sizini ukuba siyilwele. Sifuna ukusonga sisendaweni yesithathu kwi- log. Singakujabulela kakhulu ukuyogijima kule midlalo yase-Afrika ngoba iqinisa ukhakhayi. Nokho indlela yethu kufanele idlule kwiMaritzburg okuyiyona ehleli kule ndawo.
“Lo mdlalo ngeke na- ngengozi ube lula kodwa kufanele silwele ukuwunqoba. Kumele sizisusele thina iMaritzburg kule ndawo.
"Sizimisele ngokusonga le sizini ngegiya eliphezulu emuva kokudonsa kanzima isizini yonke,” kusho uParker.
Uthi kusenzima ukudlulisa emiqondweni okwenzeke eMoses Mabhida Stadium ngesikhathi bekhishwa yiFree State Stars ngo-2-0 kowandulela owamanqamu weNedbank Cup.
Abalandeli bavuke umbhejazane, basiphula izihlalo baziphonsa enkundleni, bashisa ingxenyana yenkundla.
“Bengiqala ukubona into enjena empilweni yami. Le nto isethusile, isenze sabona ukuthi abantu bayithanda kanjani le kilabhu. Kuzofanele sizame ukushintsha ukwenza ukuze singaphinde senzeke isigameko salolu hlobo,” kusho uParker ezakhe eziguqiswe yiLamontville Golden Arrows ngo-3-1 koweligi ngoLwesibili ebusuku ePrincess Magogo Stadium, KwaMashu.
Amagoli okunqobe ngawo i-Arrows abekwe enethini nguLerato Lamola amabili nelikaVelemseni Ndwandwe, kwathi eleChiefs lokubika ekhaya lashaywa nguParker. IChiefs iqede lo mdlalo ingasaphelele kukhishwa ngekhadi elibomvu uLeonardo Castro.
UFadlu Davids ocija iMaritzburg, uthi nabo bakugaqele ukuya e-Afrika.
“Okuningi okusenzakalele ngale sizini kusha kithina, yinto esingayazi. Nathi sizimisele ngokuyozizwela ukuthi kunjani e-Afrika. Nokho akuyona into esiyifake emakhanda leyo ngoba kuningi okufanele sikwenze. Okokuqala nje sisazama ukusula lo mqondo kubantu wokuthi iMaritzburg ihlale ivika izembe.
“Le sizini ibiyinto engachazeki, bekunzima.
"Lapha esihleli khona yindawo okuhlala kuyo amakilabhu anjengeSuperSoprt United neBidvest Wits kodwa abhinjelwe yizinto kule sizini.
"Nginesiqiniseko sokuthi ngesizini ezayo azobuya ngamandla ngakho-ke kufanele silindele noma yini,” kusho uDavids.
Isiyonke imidlalo ye-Absa Premiership ezogijinywa ngoMgqibelo iqhathwe kanje:
EPrincess Magogo Stadium: Golden Arrows vs Platinum Stars 15h00.
EPeter Mokaba Stadium: Baroka FC vs Bloemfontein Celtic 15h00.
EGoble Park: Free State Stars vs Polokwane City 15h00.
ESisa Dukashe Stadium: Chippa United vs SuperSport United 15h00.
EFNB Stadium: Kaizer Chiefs vs Maritzburg United 15h00 (SS11).
ECape Town Stadium: Cape Town City FC vs Orlando Pirates 15h00 (SS10).
ELucas Moripe Stadium: Mamelodi Sundowns vs Ajax Cape Town 15h00 (SS4).
EBidvest Stadium: Bidvest Wits vs AmaZulu FC 15h00.
Imidlalo yamakilabhu avika izembe izoboniswa izikhawu kwiSS12.