Umkhwekazi kaZuma uthi akasifuni isithembu
Kodwa uthi ngeke ayikhethele ingane yakhe
AKAYIZWA eyesithembu unina wentombazane yaseMatolweni, eMatatiele, okuthiwa izaliswe nguMnu Jacob Zuma (76) ( osesithombeni) obengumengameli waseNingizimu Afrika njengoba kunamahlebezi athi angase ayithathe ayenze inkosikazi.
UNkk Nombuso Mokoena, ongunina kaNkz Nonkanyiso Chonco (25), uthi akasithandi nhlobo isithembu ngoba siyakhulumisa. Uthi kodwa kakukho angakwenza uma ingane yakhe isikhethe umuntu emthandayo ngoba isikhulile futhi iziphathe kahle yaze yenzelwa umcimbi wokuyikhulisa nowokuyibonga ngokuzigcina kwayo ebuntombini “ngoba izingane kazisaziphathi kahle”.
“Kangisithandi isithembu ngoba kangizwani nokukhuluma. Ngisho emzini wami ngizihlalela nezingane zami akukho okungihlanganisa nemizi yabantu, ngiziphilela impilo yami ngedwa. Akukho-ke engingakwenza uma yona ingane isizikhethele umuntu emthandayo,” kusho uNkk Mokoena.
Uthi kumethusile ukukhulelwa kwengane yakhe ngoba besingabonakali isisu sayo futhi kungekho okusolisayo. Utshele leli phephandaba nokuthi uyazana noMnu Zuma futhi bayahloniphana.
“Sazane noMnu Zuma ngaphambi kokuba aphume esikhundleni sokuba ngumengameli futhi uma sibonana, uyangihlonipha. Akukho azokwenza ngoba ngingunina kaNonkah,” kusho uNkk Mokoena.
Akathandanga ukudalula iminyaka yakhe yobudala kodwa inkosana yakhe enezingane ezine, uMnu Thanduxolo Chonco, ineminyaka engu-40 ubudala kanti yena ulinganiselwa kwengaphezulu kuka-60.
ILANGA lifike kwaChonco lafica umakoti okuvezile ukuthi umkhwekazi kaMnu Zuma ukujabulele kakhulu ukuzwa izindaba zendodakazi yakhe (noMnu Zuma).
Ulitshele ukuthi uNkk Mokoena akahlali kulo muzi, usebenzela edolobheni, nebala lanikela khona. Lifike walamukela kahle kodwa kube nzima ukukhuluma naye yize ebeyiphendula eminye imibuzo kodwa ethi akazwani nokukhuluma.
Ubengaswabulukile, kubonakala nje ukuthi uvinjiwe ukuba akhulume nabezindaba. Ubephendula ngezwi elilodwa, engafuni ukwenaba.
“Bengingazi ukuthi ingane yami isigcwele emaphepheni. Ngizwe omunye umuntu ethenga iphephandaba ethi usabuka nasi isiphalaphala sikaMnu Zuma, uma ngithi ngiyabheka hhawu! nguyena uNonkanyiso,” kusho uNkk Mokoena.
Utshele leli phephandaba ukuthi indodakazi yakhe ikhulele ePalm Ridge, eGoli, lapho bebehlala khona bonke wabe esebakhela umuzi wakwaChonco, okuyisibo-ngo sakhe, kwazise ubeseshadele kwaMokoena - oku- yilapho ahlala khona ngokugcwele.
Uveze nokuthi ubengakaze alubhade kwaZuma eNkandla. Izindaba zobudlelwano bukaNkz Chonco noMnu Zuma, ziputshuke emuva kokuba kubonakale uMnu Zuma esibhedlela esiseHillcrest eyobona ingane ebisanda kuzalwa.
Ngokusho kukaNkk Mokoena, ingane ezelwe kwaMnu Zuma nguSakhumuzi Zuma.
Ukuzaliswa nguMnu Zuma kumdalele amazinyo abushelelezi uNkz Chonco njengoba inhlangano yamalungelo abesifazane engayenzi inzuzo, iShe Conquers, imyalele ukuba esule esikhundleni sokuba ngumkhulumeli wayo.
Le nhlangano, ekhankasela ukuthuthukisa impilo yamantombazanyana asakhula, ithe uNkz Chonco wehlulekile wukuveza ubudlelwano bakhe noMnu Zuma, wenza okuphambene nezimiso zale nhlangano.
“Singamantombazanyana siye silingwe, sisetshenziswe ngabantu abasemandleni,” kusho isitatimende sale nhlangano.