Ikhetha iphela emasini i-IAAF ngoCaster
UHULUMENI waseNingizimu Afrika ubhodla umlilo kufanele ngomgomo we-International Association of Athletics Federations (IAAF), elawula ezokusubatha emhlabeni, obukeka wakhiwe ngokukhethekile ukulwa ngqo nempumelelo kaCaster Semenya kwezokugijima.
Ngeledlule i-IAAF iphasise umgomo ovimbela abagijimi besifazane, abazalwe bembethe amandla ( testosterone) athe xaxa kunajwayeleke kwabalobu bulili, ukubamba iqhaza emijahweni kusuka ku-400m, u-800m no-1 500m. La mabanga agijinywa nguSemenya futhi ugila izimanga kuwona ikakhulukazi ku-800m naku-1 500m. I-IAAF ithi kusuka mhla lulunye kuNovemba, uCaster ngeke esavumeleka ukubamba iqhaza kula mabanga uma engawasebenzi amaphilisi azokwehlisa amandla endalo.
Nokho uvumelekile ukubamba iqhaza ku-5 000m naku-10 000 ngamandla akhe endalo. Okwenza ukuba sibuke lo mgomo weIAAF wakhelwe ukulwa noCaster siqu, wukuthi le nhlangano izishaye indiva izincomo ebezithi ukuba namandla athe xaxa kumsiza kakhulu umsubathi owenza i- hammer throw. I-IAAF kayiyingenanga eyabe- hammer throw ngezizathu ezaziwa yizikhulu zale nhlangano kuphela. Kunalokho zigxile emabangeni kaCaster. Lokhu kwenza sikholwe ngabathi amazwe asentshonalanga ayakuzonda ukuvelela kwe-Afrika okwenza abagijimi bakhona babe yinyama komabonakude bomhlaba.
Phela lokhu kwenza abaxhasi bathutheleke kubasubathi abavela kakhulu komabonakude. Yingalesi sizathu sikubuka kuyichilo okwenziwa yi-IAAF. Sikholwa wukuthi le nhlangano isenomsebenzi wokulwa ngempumelelo nabasubathi ababamba iqhaza emijahweni yayo bedle izidakamizwa ukuze banqobe. UCaster akakaze nangolulodwa usuku kutholakale egazini lakhe izidakamizwa. Pho ulwiselwani ngemvelo?
Kubukeka i-IAAF ilawulwa ngamazwe asethuthukile kwezomnotho njengoba i-United States of America (USA) isanda kuphakamisa ukuba le nhlangano imise iKenya kwezokugijima emhlabeni, iyisola ngokusebenzisa izidakamizwa. IKenya inabagijimi abavelele emabangeni amade.
I-USA isho lokhu nje, nayo kayikho msulwa ekusetshenzisweni kwezidakamizwa njengoba bekhona abagijimi bakuleliya lizwe asebeke bamiselwa zona. Siyazibuza ukuthi isinqumo esifanayo singathathelwa yini umgijimi wesilisa uma kungatholakala ukuthi unamandla ngokuphindwe mhlawumbe kabili kwajwayelekile. Ukuze i-IAAF ingabukeki njengenhlangano ekhetha iphela emasini, sikholwa wukuthi kumele ithathe imigomo ngokungachemi namuntu. Uma kunokuthile okungavumelekile, sikholwa wukuthi kungaba ngcono nxa kungeke kwamukelwe kuzona zonke izingxenye zayo.
Kasikholwa ukuthi ngabe kukhona onenkinga noCaster ukuba akawaphuli ephindelela amarekhodi omhlaba. Sikuqonda kahle ukuthi lolu daba lukaCaster ludala njengoba luqale ngo-2009 enqoba igolide ku-800m emidlalweni ebiseBerlin, eGermany. Emuva komsindo oqubuke ngobulili bakhe, izembe ligcine ligawula uLeonard Chuene obengumengameli we-Athletics South Africa (ASA) ngaleso sikhathi. Phakathi kokudalele uChuene amazinyo abushelelezi, yizinsolo zokuthi wehlulekile ukuphatha ngesinono udaba lobulili balo msubathi odabuka eLimpopo.
Ububi balo mgomo wukuthi ungaba nomthelela omubi nasemazingeni aphansi lapho kungasukelwa nanoma yimuphi umsubathi wesifazane ongathandeki kontanga yakhe, abizwe "ngoCaster" okungamele agijime namantombazane. Kakade kuyinto ejwayelekile ezikoleni ukuthi nxa nifuna ukuthena amandla owesifazane owenza kahle kwezemidlalo nimhashe ngokuthi: “Uyindoda!” Okuhle wukuthi osondonzima babaholi bezokusubatha e-Afrika bami noCaster.