Kugwetshwe undlunkulu ngenkohlakalo
Umndeni uzizwa utheleke ngehlazo
INGENE kwelikhulu ihlazo inkosikazi yenkosi yesizwe saKwaMpumuza, eMgungundlovu, egwetshwe ngeledlule iminyaka ewu-5 ibhadla ejele ngecala lokukhwabanisa.
Ikhulunyelwa emakhoneni eyokugwetshwa kukaThatheni Zondi uMaNtombela, oyinkosikazi yesithathu emakhosikazini amane eNkosi Nsikayezwe Zondi, okumanje uphakathi ezikiti.
Kubikwa ukuthi uMaNtombela ugwetshwe ngeledlule yiNkantolo yeMantshi yaseMgungundlovu, ngecala lokukwabanisa intela kwaSouth African Revenue Service (Sars).
Kuthiwa inkantolo imthole enecala ngemuva kwesikhathi eside amacala ewaphika, eshintsha nabameli. Ugwetshwa nje, ubengusomabhizinisi owaziwayo endaweni futhi ophumelele, enenkampani iThatheni Construction, ezitamuzela amathenda eminyangweni kahulumeni.
ILANGA lithole ngemithombo yalo ukuthi udaba lukaMaNtombela lufihliwe njengoba kuyinto eyihlazo, obekungamele iphumele emphakathini. Kuthiwa yize ibifihliwe, kodwa amalungu omphakathi aseyayazi, ayixoxa emakhoneni.
ILANGA likhulume nendodana endala yenkosi, uMnu Sandile Zondi, ebibhodla umlilo ngalolu daba. Ichaze isenzo sikanina omncane ngechilo elidicilela phansi ubukhosi besizwe saKwaMpumuza nesibongo sakwaZondi.
“Siyakuqala lokhu siwumndeni wakwaZondi ukuba kugwetshwe inkosikazi yenkosi. Kusithele ngehlazo elikhulu elisilethela amahloni emphakathini siwumndeni, kuyichilo emndenini wethu nasesizweni saKwaMpumuza, kasifisi ukuba kuphinde kwenzeke emndenini wethu.
“Okusikhathaza kakhulu wukuthi umuntu owenze into embi kangaka yilo okumele ngabe uba yisibonelo esihle emphakathini. Siwumndeni wakwaZondi sifisa ukuxolisa esizweni sakithi, siyafisa ukuba abantu baqhubeke nokukholelwa ebukhosini bakwaZondi,” kusho uMnu Zondi.
ILANGA likhulume namalungu omphakathi waKwaMpumuza ukuzwa ukuthi ngabe aseluzwile yini udaba lokuboshwa kukandlunkulu wawo. Akhulume naleli phephandaba phansi kombandela wokuthi amagama awo angadalulwa.
Elinye lithe: “Indaba kaMaNtombela ikhulunyelwa phansi, isizwe kasibikeliwe ngale nto. Siyasola ukuthi bazoyinyathela ngezinyawo abantu baze bakhohlwe.
“Siyakuqonda ukuthi kungani bengafuni yaziwe le ndaba, phela uMaNtombela ubengumuntu ohloniphekile emphakathini wethu njengoba ephuma nasekhaya okuphilwa kahle kulona."
ILANGA lishayele iNkosi Zondi, ukuthola kabanzi ngalolu daba, ithe impela umkayo uboshiwe. Ithe uboshwe engemuhle egazini - okusho ukuthi ubegula kodwa udaba bazoludlulisela phambili ngoLwesihlanu.