ACOSHWA PHANSI AWOKUBUKA USUTHU

AMAZULU FC asezinhlelweni zokuthenga abadlali abanohlonze ukuze enze kangcono ngesizini ezayo kwi-Absa Premiership.

USuthu luzovala le sizini ngomdlalo elizobhekana kuwona neCape Town City kwi-Absa Premiership ngoMgqibelo ozayo womhla zili-12 kwephezulu eKing Zwelithini Stadium, eMlazi.

Kulo mdlalo kulindeleke ukuba kuphume nesinedolo njengoba uSuthu lunqume ukuwehlisa ama- thikithi awo.

Azobiza u-R10 nje kuphela kanti aseyatholakala njengamanje emacomputicket.

Nokho abazofuna ukuwathenga esangweni bazowathola esebiza u-R40.

USuthu luhlose ukubungaza ukungayi ehlathini njengoba luphoxe izimfamona ebezilibeka ngesihloko elokuthi luzobuyela kwiNational First Division (NFD).

UBrilliant Mkhathini wezokuxhumana kumaZulu, uthi njengoba sebesindile nje, bazimisele ngokwenza kangcono kakhulu ngesizini ezayo.

“Kule sizini sithwale kanzima, kukhona abebethi sizogencwa yizembe kodwa akwangenzeka lokho.

"Kulo mdlalo weCape Town City sihlose ukubonga abalandeli bethu, yingakho sinqume ukuwehlisa amathikithi siwabize u-R10.

"Siyacela ukuba abantu basheshe bawathenge kodwa abazowathenga enkundleni azokube esebiza u-R40,” kusho uMkhathini.

Uthi ngesizini ezayo uSuthu luzokube lubaba.

“Njengoba sekuqaliwe kukhulunywa ngabadlali esibasayinisile engingabala kubona uNhlanhla Vilakazi obekwiFree State Stars nomgadli wase-Argentina, zikhona nezinye izindawo esisazoziqinisa.

"Sifuna ukuba nembumba yeqembu ngesizini ezayo.

"Sizimisele ngokwenza kahle zisuka nje ebhandeni ngoba ngale sizini vele besifuna ukungayi ehlathini,” kusho uMkhathini.