LIMLAHLILE ICALA OWABULALA UKARABO
LIMLAHLILE icala lokugwaza abulale obeyintombi yakhe uSandile Mantsoe, izolo ngoLwesithathu eNkantolo eNkulu yaseGoli.
UMantsoe ulahlwe yicala lokubulala uKarabo Mokoena (22), obeyintombi yakhe qede washisa isidumbu sakhe wasilahla ngalapho kulahlwa khona udoti, ezama ukufihla ubufakazi ngo-Ephreli wonyaka ophelile.
Limlahla ngecala ibamba lejaji uPeet Johnson, lithe kalingabazi ukuthi uMantsoe, umbulele uKarabo maqede wamshisa ezama ukufihla ubufakazi.
Ibamba lejaji liphinde lathola uMantsoe, enecala lokuvimbela ukusebenza kwengalo yomthetho nelokushaya ngenhloso yokulimaza obeyintonbi yakhe.
Isidumbu sikaKarabo sitholwe ngumuntu obedlula ngendlela eLyndhurst, eGoli ngonyaka ophelile. Phambilini uMantsoe uveze ukuthi uKarabo ubengowesifazane onodlame, obeyithanda ngokweqile impilo ewubukhazikhazi.
Esitatimendeni esifundwe enkantolo phambilini, uMantsoe uveze ukuthi uKarabo ubemshaya nokuthi ubenentukuthelo futhi enokhwantalala emuva kokudlwengulwa ngumngani womuntu oyethandana naye phambilini.
Uphinde wathi uKarabo ubejwayele ukuzisika futhi nodadewabo uyakwazi lokho. UMantsoe ushadelwe, unezingane ezintathu. Kubikwa ukuthi uthandane noKarabo kusukela ngoMfumfu ka-2016.
Kukholakala ukuthi yena nomkakhe bebengasahlali ndawonye ngenxa yezinkinga emshadweni wabo. Uphikile ukuthi ubulale uKarabo kodwa ngesikhathi efaka isicelo sebheyili, uveze ukuthi ulahle isidumbu sakhe ngemuva kokuba esifice endlini yakhe.