Ubewuthanda umndeni wakhe uBheka
Lndodakazi yakhe isixoxela ngobudlelwane babo
IGEQE amagula ngoyise indodakazi kaBheka “Mlisa” Phakathi (48), ozakhele igama egijima kwiLamontville Golden Arrows ne-Orlando Pirates eminyakeni edlule.
UBheka udlule emhlabeni ngoMgqibelo engozini yemoto ngaseGreytown.
UNkz Lwazi Phakathi (21), oyindodakazi endala kaBheka - odlule emhlabeni eseqeqesha Umvoti FC, odlala kwiSafa KwaZulu-Natal ABC Motsepe League - uchaze uyise njegomuntu obewuthanda kakhulu umndeni wakhe futhi emkhuthaza yena nezingane zakwabo ukuba bafunde.
Uthumele umyalezo echaza ngubudlelwano abenabo noyise.
“Nakuba kunzima kodwa ngiyazama ukuthola amazwi aqondile engingawasho ngobaba. Umama uhlale engazisa ukuthi kwakunzima ukungehlukanisa nobaba ngisemncane.
“Ngiyajabula ukusho ukuthi kakujikanga lutho nangesikhathi ngikhula. Ngikhule ngihlala nogogo ozala umama isikhathi esiningi, nokho njalo ngezimpelasonto ubaba ubengilanda. Bekuba wumzukuzuku nxa sekumele ngisale emzini kagogo.
“Bekumele ubaba angicashele njalo uma esehamba. Bengibambe iqhaza elikhulu kwezemidlalo nezobuciko ngesikhathi ngisafunda amabanga aphansi kanjalo noma sengenza aphezulu - cishe bengenza yonke imidlalo - ubaba ubengatheneki amandla, engihambisa abuye angilande noma kuphi lapho sizilolonga khona. “Bekungakhathalekile ukuthi siqeda ngasikhathi sini. Bekuthi nxa ngiqeda ukuzicija ngimfice esengilindile emotweni.
“Ngeledlule uhambele umhlangano wabazali obusebusuku esikoleni sikadadewethu omncane, uKwanele. Bekuthi njalo uma ebuyile ayobuka uKhayelihle edlala abuye aqinisekise ukuthi uLuyanda unazo zonke izimfanelo zesikole.
“Ubaba ubezibambela mathupha kukho konke, ubesithanda futhi esifisela konke okuhle,” kusho uLwazi.