Kunzima "koshadiswe" nowokufika kuleli
Uthi akakwazi ngisho ukushayela izingane zakhe izitifiketi
UKHALA ezimathonsi owesifazane waseColenso, eMnambithi, othi utshelwe ngabehhovisi loMnyango wezaseKhaya kule ndawo ukuthi ngo-2007 ushade nowesilisa okuvela ukuthi ngowaseGoli.
UNkk Khululekile Akeuwulu (42), uMaThwala, uthi ucela usizo ukuze kulunge indaba yalo mshado wakhe nowesilisa onguVictor Ugonna Akeuwulu, eseyenze impilo yakhe yaba nzima ngoba ushadi- swe engazi. Uthi usehambe waze waba mfushane ezama ukuyilungisa kodwa lutho.
Utshele ILANGA ukuthi ngo-2007 ulahlekelwe wumazisi wakhe kwathi uma eyokwenza omusha kwandabazantu eMnambithi - ngawo lo nyaka - wathola ukuthi ushade nalo Mnu Akeuwulu.
Utshele leli phephandaba ukuthi kuvele kwaduma ikhanda ngesikhathi ezwa lezi zindaba ngoba yena akaze ashade namuntu futhi akaze agingqe zithupha (zomshado).
“Inhliziyo yami icishe yama ngesikhathi ngithola umbiko othi ngishade nalo Victor engingamazi. Kuyimanje lo mshado-mbumbulu wenza impilo yami ibe nzima njengoba ngingakwazi ukwenza lutho.
“Ngikhuluma nje kangikwazi ngisho nokwenzela izingane zami ezimbili izitifiketi zokuzalwa, ngeke ngikwazi ukuzishayela ngesibongo engingasazi. Sekuze kwaguga izicathulo ngenxa yokuthi ngilokhu ngehla ngenyuka emahhovisi akwandabazabantu kodwa lutho usizo. Ngingajabula uma uMnyango wezaseKhaya ungangenelela ngoba ngihlulekile,” kusho uNkk Akeuwulu.
Uthi uyile emaphoyiseni eyowabikela ngalolu daba kodwa akalutholanga usizo, utshelwe ukuthi kumele aye kwandabazabantu.
Okhulumela iHhovisi loMnyango wezaseKhaya KwaZulu-Natal, uMnu Cyril Mncwabe, uthe umnyango uzophenya kabanzi ngalolu daba.
“Odabeni olufuze lolu, ku- yenzeka ukuthi umuntu akhokhelwe imali bese eshada nomuntu wokufika ngoba efuna ukuthola ubuzwe baseNingizimu Afrika.
“Umnyango uzokwenza uphenyo olunzulu ukuze uzothola ukuthi ngabe uKhululekile uyawazi yini lo mshado. Uma kutholakala ukuthi uyawazi, into engamsiza wukuba adivose nomyeni wakhe,” kusho uMnu Mncwabe.
Okhulumela amaphoyisa, uLt Colonel Zwane, uthe kuyicala elibomvu ukusebenzisa imininingwane yomumtu.
Uthi umuntu obhekene nale nkinga angakwazi ukuvula icala lokukhwabanisa.
“Umuntu otholakala esebenzisa imininingwane yomunye umuntu ngokungemthetho uyaboshwa bese ebhekana nengalo yomthetho,” kusho uLt Colonel Zwane.