Uqinisa eyokuvula isibhedlela esizimele
Ukhuliswe nguninakhulu kunzima udokotela onconywa ngomjovo
UKUKHULISWA nguninakhulu obengasebenzi, kumgqugquzele ukukhathalela intsha ephuma emindenini exakekile uDkt Thulani Ndlovu (46) ( osesithombeni) odume kakhulu KwaZulu-Natal ngokuba nemijovo etuswa ngokuvusa iziguli okhukhweni lokufa.
Nakuba eminyakeni ewu-17 edlule uDkt Ndlovu evule iMedical Centre elokishini labampisholo laseMtshezi, iWembezi - elike laduma ngodlame phambilini - kodwa sekuyinto ayejwayele ukufika kweziguli eziqhamuka ngisho nangaphandle kwaKwaZulu-Natal ngethemba lokusizakala.
Ushaqise abaningi abesebevele behambela indawo yakhe ayivule ngo-1997 edolobheni eMtshezi, ngesikhathi ethuthela eWembezi ngo-2001. “Ngigqugquzelwe wukubona impumelelo yomngani wami, uDkt Thami Nkosi, osungule kuqala indawo efanayo eZakheni, eMnambithi.
"Ngikubone kukuhle ukusondela kubantu. Yize-ke ukuza eWembezi kungiqhelise kwabanye kwazise le ndawo ihanjelwa ngabantu abaqhamuka ezindaweni ezahlukene,” kuchaza uDkt Ndlovu.
Uthi umkhakha wobudokotela ufana nobizo kuyena njengoba eqale ukuwuthanda enza ibanga lesibili esikoleni (osekuwu-Grade 2 njengamanje), eDundee.
Uyahleka uma ebuzwa ngedumela lemijovo yakhe, esichazwa ngokuthi ivusa abantu asebegulela ukufa. “Empeleni ngisebenzisa imijovo efana neyabanye odokote- la, mhlawumbe-ke umehluko ungaba sekutheni sithenga imithi ebizayo kuphela lapha.
"Inhloso wukuzama ukuqinisekisa ukuthi isiguli siyelapheka ekufeni okusiphethe, singalokhu sibuyiswa wukufa okufanayo,” kusho uDkt Ndlovu egcizelela ukuthi imithi ayisebenzisayo ngevumeleke ukuthengwa yinoma yimuphi udokotela. Nokho uthi okumqoka wukuyisebenzisa imithi, ungayithengi nje bese ihlobisa amashalofu.
Uthando lokuphilisa abantu luholele ekuqaleni umkhankaso wokwakha isibhedlela esizimele eMtshezi. Kulo mshikashika uDkt Ndlovu ubambisene nabangani bakhe ababili abangodokotela khona eMtshezi.
“Indawo esizokwakha kuyona isibhedlela esizimele sesiyitholile. Kuyinto ebuhlungu ukuthi umuntu waseMtshezi odinga isibhedlela esizimele kufanele ahambe ibanga elibalelwa ku-70km eyothola usizo eMnambithi, eHowick kumbe eMgungundlovu.
"Ngibambisene noDkt Lindani Ntuli noDkt Sibusiso Mzinyane ekusunguleni lesi sibhedlela,” kusho uDkt Ndlovu owenze amabanga aphezulu eThalane High School, eDundee, waphothula umatikuletsheni ngo-1988 eVryheid State High, edume ngoMphumulo.
Unyelwe yinyoni esandleni ethola umfundaze wokwenza ubudokotela eMedunsa ngo-1989 kuya ku-1995.
Uphume neBachelor of Medicine and Bachelor of Surgery (MBChB). Uthwasele ubudokotela e-Addington Hospital, eThekwini, ngo-1996.
Ngaphambi kokuqala ukudlondlobala ngo-1997, ushonelwe nguninakhulu obeyikho konke kuyena.
“Nakuba ugogo ebengaqashwe ndawo, kodwa ukwazile ukungikhulisa. Ukuhlupheka ngikwazi kahle, yingakho-ke ngathatha isinqumo sokuba minyaka yonke kube nomfundi oyedwa oqhamuka emndenini oxakekile engimfundisa kunoma yisiphi isikhungo semfundo ephakeme.
Ngimenzela konke okusuke kudingeka. Uma eseziqedile iziqu, ngibheka omunye engisuke ngizomsiza ukubuyisela emphakathini,” kusho uDkt Ndlovu.
Uthi uthando lwakhe olukhulu lusekusizeni abahaqwe yisandulela-ngculaza nengculaza uqobo kanjalo nabanezifo ezibizwa ngamahlalakhona - kubalwa kuzona ushukela.
“Le ndawo ibalwa neziyisihlanu ezihamba phambili KwaZulu-Natal ngokusiza ngempumelelo abanesandulela-ngculaza,” kusho uDkt Ndlovu onaneDiploma in HIV Management ayenze e-University of KwaZulu-Natal neDOH yaseUniversity of Free State.
Ngesikhathi ILANGA lihambele kule ndawo, lificane nendoda ebiqhamuka eNorthern Cape, ihambise unina ozinze eBergville. Ithe kudala yayizwa ngemijovo yakule ndawo, yabe seyilinda impelasonto ende ukuyisa ngayo unina.