Ungavumi ukuba yisigqila somona
ISIZULU sakithi esihle siyasifundisa ukuthi emhlabeni kakuvelwa kanyekanye kungemadlebe embongolo.
Lokhu kuchaza ngokusobala ukuthi singabantu kasisoze saphumelela ngesikhathi esisodwa noma ngabe sizalwa ndawonye.
Okumele kwenziwe yilona ithuba lakhe elingakafiki, wukwamukela ukuthi nelakhe liseza, angabi nomona ngalona osefikelwe yisikhathi sakhe - kuze kudaleke ubutha obungenasidingo. Kunenunu enkulu ekubantu bakithi kulesi sikhathi samanje ebizwa ngomona.
Abantu bakithi kusukela emindenini, komakhelwane, emiphakathini kuya ezindaweni zokusebenza, umona ukhona futhi uthanda ukuba namandla, wenza bangafiselani okuhle futhi udala nokuba kungabi nokuthula endaweni lapho usuvezwe khona.
Kweminye imindeni uma kukhona ophumelela ukwedlula abanye - mhlawumbe ubekade ezisebenzela kanzima bebuka abomndeni wakhe - kuphuma amagama afana nokuthi lona wantshontsha idlozi noma wathwala, yingakho esenjena yedwa. Kuyethusa kakhulu emindenini uma lesi sihlava somona sesikhule kangangokuthi sesiphakathi kwezingane eziphuma sendelinye noma ezancela ibele elilodwa.
Esikhundleni sokuba lona okungakamlungeli abuze kosephumelele ukuthi yimaphi amasu awasebenzisile amsiza - ukuze phela naye atabalase aze afike empumelelweni, - lutho, ngeke abuze ngoba ebona sengathi uyazehlisa.
Uvele akhethe okunzima kakhulu, ukuba nenzondo. Imindeni igcina ingasangenelani isihlekwa yizwe kanti umsuka walokho wumona nje ongaxutshwe nalutho.
Kuvamile futhi ukuba lona obehlale ebukeleka phansi emndeni- ni kube nguyena ovela kuqala ngempumelelo kuthi lona obezibona engcono ezakhe izinto zingasheshi bese, uyasuka-ke umhobholo. Esimeni esibi kakhulu, kugcina kungasabhekwana kuze kunukwane nangobuthakathi.
Le nto-ke yale nzondo ikhula ize igcine isiphazamisa nomsamo oyinsika yekhaya, kugcine sekuthukuthelise abadala okuyothi ekugcineni kudingeke izinhlambuluko esezingenisa umndeni ezindlekweni ngenxa nje yokungemukeli ukuba omunye aphumelele kuqala.
Abanye baphumeleliswa yinhlonipho noma wukuzikhandla, benza izinto zabadala mhlawube ezaziyizikweletu zabazali babo. Uma sebejabula abadala ngoba sebelungiselwe izinto zabo, noma kanjani lona obezikhandla ngabo ebalungisela kuba nguyena ovame ukwehlelwa yizinto ezinhle, ehlelwe yizibusiso bese kusuka umona kwabanye sekuthiwa uselintshontshile idlozi, walithwebula ukuthi libheke yena yedwa.
Isihlava somona kasigcini nje emindenini kodwa nasemisebenzini sikhona futhi abantu baze babulalane noma baxoshisane emsebenzini ngenxa yokungafuni ukwemukela ukuthi kuseyithuba lomunye.
Kuke kuthi kunesikhundla esisodwa okumele kuqashwe kusona umuntu kodwa uthole sesibangwa abanini bebe bazi kahle ukuthi vele ekugcineni bekumele kuqashwe oyedwa, sebeyomngcofa-ke lona ositholile aze mhlawumbe agcine engasawenzi nakahle umsebenzi.
Ngiyafisa sengathi besingake sizihlolisise singabantu, siwuyeke lo mkhuba womona ngoba uyagqilaza kakhulukazi kumnikazi wawo. Masifundeni ukwamukela iziphiwo zethu nokuthi izinto zenzeka ngesikhathi esifanele, kudingeka uzikhandle ukuze uphumelele hhayi ukukhangeza nje.
Singavumi ukuba yizigqila zomona ngoba lokho kukwenza ungabe usakwazi nokucabanga ngendlela eyiyona, usubuswa yimicabango emibi yokudicilela impilo yabanye phansi.
Makhosi Ndleleni uMaZulu wakwaZondo Insika yaMathiyane (isigodlo) UThishanhloko waseMatatane Secondary School mthiyabesgs@yahoo.com Ungasithinta noma uWhatsApp kwethi: 082 752 7342